Është zbardhur vendimi i Gjykatës së Parisit, e cila e shpalli fajtor këtë të hënë udhëheqësen e partisë së djathtë në France, Marine Le Pen dhe 8 eurodeputetë të tjerë për përvetësim të paligjshëm të fondeve publike.
Mediat vendase raportojnë se Le Pen është dënuar me 4 vjet burgim, si dhe ndalimi për të kandiduar për poste publike për pesë vjet, duke i vënë në rrezik karrierën politike, pasi i shuhen aspiratat për të marrë pjesë në garën presidenciale në Francë.
Gjithashtu, Marine Le Pen është gjobitur edhe me 100 mijë euro gjobë. Gjithsesi, Le Pen nuk do të shkojë në qeli, pasi dënimi me burg i është konvertuar dhe për dy vite do të monitorohet me byzylyk elektronik.
Mediat e huaja raportojnë se Marine Le Pen pritet ta apelojë vendimin e Gjykatës së Parisit dhe ky vendim nuk do të zbatohet tani. Duke pasur parasysh ritmet e drejtësisë, procesi i dytë mund të zhvillohet jo më herët se në vjeshtën e vitit 2026, vetëm pak muaj para zgjedhjeve presidenciale.
Le Pen dhe 24 zyrtarë të tjerë nga partia e saj “Fronit Kombëtar” u akuzuan për përvetësimin e më shumë se 3 milionë eurove të fondeve të Parlamentit Evropian për të paguar stafin me bazë në Francë.
Parlamenti Europian ngriti për herë të parë dyshime për punësime fiktive në vitin 2014, fillimisht në lidhje me partinë “Front National”, që më pas u bë “Rassemblement National”.
Procesi gjyqësor akuzoi Marine Le Pen për përvetësim të fondeve publike përmes financimit të ndihmësve parlamentarë europianë të FN-RN, të cilët nga viti 2004 deri në 2016 në fakt punonin për partinë në Francë dhe jo për eurodeputetët në Strasburg apo Bruksel.
“Është vdekja ime politike ajo që kërkohet,” tha Le Pen në nëntor të vitit 2024, kur prokurori i çështjes dha pretencën dhe kërkonte dënimin e saj.
Disa ditë para vendimit, Marine Le Pen u shpreh në një intervistë për La Tribune: “Kam lexuar këtu e atje se jemi të shqetësuar. Personalisht, nuk jam, por e kuptoj pse mund të jemi: me ekzekutimin e menjëhershëm, gjyqtarët kanë në dorë fatin e lëvizjes sonë.”
