Policia e Tiranës, në kuadër të operacionit të koduar “Imazhi” ka goditur dy raste të shtrëngimit me anë të kanosjes për dhënien e pasurisë.
Më konkretisht, në një rast ka arrestuar një 27-vjeçar dhe ka proceduar një 25-vjeçare, pasi akuzohen se kanë kanosur një 33-vjeçar, që t’iu jepte 1000 euro, për të fshirë foto/shkrime mbi jetën private të tij, nga rrjeti social “Tik Tok”.
“Si rezultat i operacionit u arrestua shtetasi F. T., 27 vjeç, si dhe u procedua penalisht shtetasja L. M., 25 vjeçe, pasi në bashkëpunim me njëri-tjetrin, kanë kanosur një 33-vjeçar, për dhënien e shumës 1000 euro, që të fshinin disa foto/shkrime të jetës së tij private, nga rrjeti social “Tik Tok”.” – njofton Policia.
Gjithashtu, blutë e kryeqytetit raportojnë se kanë ndaluar edhe shtetasin L. H., 21 vjeç, për shtrëngimin me anë të kanosjes për dhënien e pasurisë, ndodhur me datë 14 Mars, bazuar në kallëzimin e bërë nga një shtetas.
Materialet procedurale i janë referuar Prokurorisë së Tiranës, për veprime të mëtejshme.
