Kreu i koalicionit “Nisma Shqipëria Bëhet”, Adriatik Lapaj, prezantoi në fshatin Kyçyk, Tregan në Elbasan, disa nga pikat kryesore të programit të tij për sektorin e bujqësisë, me fokus te subvencionimi për kilogram prodhimi.
Gjatë fjalës së tij, Lapaj tha se kjo skemë synon të mbështesë fermerët, blegtorët, peshkatarët dhe bletërritësit duke garantuar një sistem të drejtë dhe transparent të subvencioneve. Ai shpjegoi se çdo prodhues do të vetëdeklarohet dhe do të hapë një llogari të veçantë bankare, përmes së cilës do të marrë mbështetjen financiare bazuar në sasinë e produktit të shitur.
“Vizioni ynë është shumë i thjeshtë. Për fshatin shqiptar ne kemi një program të qartë që lidhet me subvencionimin për kilogram. Ne vendosim skemën e subvencionimit për kilogram prodhimi që do të thotë nëse një ditë falë votës suaj në pushtet do të vijmë, ju si qytetarë që jetoni në fshat do të keni vetëm dy detyrime, të cilat nuk u ngarkojnë me barrë ekonomike. Detyrimi i parë është që të gjithë ata që merren me bujqësi, blegtori, peshkim, bletërritës, këto katër kategori do kenë detyrimin e vetëm që të vetëdeklarohen si fermer, bujq, peshkatar apo bletërritës. Detyrimi i dytë do të jetë të shkoni në bankë të nivelit të dytë dhe do të hapni një llogari të veçantë vetëm për këtë gjë. S’keni detyrim financiar, thjesht do hapni një llogari bankare si fermer, si blegtor, si peshkatar, si bletërritës. Pra, shteti shqiptar do ta dijë që ky fermer ka këtë numër llogarie. Tani vijmë tek subvencionimi. Të gjithë ju, nga momenti që jeni deklaruar si fermer, blegtor, peshkatar apo bletar, dhe keni deklaruar numrin e llogarisë, do të pajiseni me sistemin online ose fizik të blloqeve të daljes së mallit. Prodhove ullinj, prodhove domate, prodhove mjaltë, prodhove qumësht, kape peshk, shkove e shite, do bësh faturën dalëse. Ai që do ta marrë tek pika e shumicës do bëjë faturën hyrëse. Në këtë moment, në llogarinë tuaj bankare nga thesari i shtetit do kalojë subvencioni për kilogram. Do thoni ju si bëhet kjo? Bëhet si ai momenti kur shkoni në supermarket, e keni parasysh kur kalon ato produktet? Aty tek kasa ja bën ajo pip, pip, pip, i fut në faturë ajo dhe printohet në fund. Edhe ju në momentin që kryesohet fatura me atë që ju e shisni, automatikisht sistemi u kalon në llogari vlerën e parave. Kjo do bëjë që për secilin nga ju shteti shqiptar të sjellë në familjet tuaja para, kjo do bëjë që subvencionimi në vit në fshatrat shqiptarë, nga 26 milionë euro që është sot dhe ato i marrin pak duar, i marrin ata që janë të lidhur me pushtetin, do bëjë që në fshatin shqiptar me prodhimin që kemi ne sot, të vijnë minimalisht si fillim 300 milionë euro dhe në krye të 4 viteve për shkak të rritjes së prodhimit si pasojë e këtij investimi dhe kësaj skeme të shkojë në 500 milionë euro. E nëse ne ja heqim salltanetëve të atyre që i keqpërdorin dhe i sjellim tek ata që i kanë duart me kallë, tek ata që punojnë tokën, tek ata që kanë bagëtinë, tek ata që bëjnë peshkimin, janë 500 miliardë lekë që do të ndahen në mijëra e qindra mijëra, të paktën në 300 mijë familje fermerësh në Republikën e Shqipërisë e blegtorësh. E kjo është mënyra që ne ta ripopulojmë fshatin dhe ta bëjmë të begatë jetën e secilit prej jush. Kjo është pika e parë.”, tha Lapaj.
