Gjykata e Posaçme ka caktuar ditën e sotme masën e sigurisë “arrest me burg” pa afat për 34-vjeçarin Edison Muçeku, pas ekstradimit të këtij të fundit nga Britania e Madhe.
Ai akuzohet nga SPAK për veprat penale: “Sigurimi i kushteve dhe mjeteve materiale për të kryer vrasje, në formë të veçantë dhe në bashkëpunim”, “Grup i strukturuar kriminal”, dhe “Pjesëmarrje në grup të strukturuar kriminal”.
Këtë të hënë prokurori Alfred Shehu lexoi para gjykatës provat e mbledhura për 34-vjeçarin pjesë e dosjes “Revanshi”, ku u goditën 7 grupe kriminale, pas zbërthimit të bisedave në aplikacionin e enkriptuar “Sky Ecc”.
Edison Muçeku dyshohet të jetë pjesë e grupit kriminal të Hektor Xheçukës, i njohur edhe me emrin Tor Xheçuka nga qyteti i Burrelit, i shpallur në kërkim nga SPAK pas operacionit “Revanshi”. Në dosjen hetimore të SPAK, thuhet se Hektor Xheçuka ishte pjesë edhe e grupit kriminal të Ervis Martinajt.
Xheçuka, mësohet se fshihet në Dubai, ndërsa dyshohet si vrasës me pagesë, ku për llogari të Ervis Martinajt ka planifikuar dhe vrasjen e Durim Bamit, plan ky i dalë në pah nga hetimet pas zbërthimit të bisedave në aplikacionin Sky Ecc.
Ndërkohë, Edison Muçeku akuzohet nga SPAK se së bashku me shtetasit Albert Zaja, Tori Xheçuka, Florenc Kelmendi dhe Ardit Gjokrosa kanë kryer veprime për të siguruar kushtet dhe mjetet me qëllim vrasjen e shtetasit, Hamza Tërziu më 21 Maj të vitit 2020 në Bulqizë.
Hektor Xheçuka ka qëlluar me armë drejt banesës së shtetasit Hamza Terziu në fshatin Zënisht si paralajmërim. Nga hetimet rezulon se Hektor Xheçuka në bashkëpunim me shtetasit e përmendur më sipër ka planifikuar që të gjuanin drejt banesës së pabanuar të shtetasi Hamza Terziu, i cili është xhaxhai i Dorjan Terziut.
Pas zbardhje së bisedave në aplikacionit Sky Ecc. duket se në këtë konflikt është përfshirë dhe familja Gjokrosa pasi pretendohet se shtëpinë e shtetasit Hamza Terziu e ka treguar Ardit Gjokrosa dhe më pas ndaj kësaj banese është gjuajtur me breshëri plumbash.
