Kryetari i Partisë Demokratike, Sali Berisha, ka shpalosur sot programin e PD-së për sektorin e mjedisit, pyjeve dhe kullotave, duke e cilësuar situatën aktuale si një emergjencë kombëtare.
Në fjalën e tij, Berisha ka kritikuar ashpër ndotjen alarmante në Tiranë, duke e renditur kryeqytetin shqiptar ndër më të ndoturit në botë, pa asnjë sistem të rregullt monitorimi dhe me një betonizim të pakontrolluar.
Ai akuzoi qeverinë për prerje masive të pemëve, duke e quajtur mashtrim premtimin për mbjelljen e 1 milion pemëve, ndërkohë që, sipas tij, janë prerë qindra mijëra të tjera.
“Flasin për Maldive, ndërsa ne kemi brigjet më të ndotura të Evropës. Bashkitë refuzojnë të paguajnë energjinë elektrike për impiantet e pastrimit, duke shkaktuar një katastrofë mjedisore” – deklaroi Berisha.
Lideri i opozitës ngriti shqetësimin për shkatërrimin e pyjeve, kullotave dhe biodiversitetit shqiptar, duke akuzuar qeverinë për ndërprerjen e çdo lloj subvencioni për pyllëzimin, bimët medicinale dhe frutikulturën. Sipas tij, ndryshimet ligjore kanë favorizuar mafian e ndërtimit, duke lejuar ndërtime në zona të mbrojtura mjedisore.
“Ligji u amendua për të hapur dyert për mafian e ndërtimit në këto zona. Sot, nuk ka asgjë të mbrojtur më,” – u shpreh ai, duke shtuar se ndotja po ndikon drejtpërdrejt në rritjen e sëmundjeve malinje tek qytetarët.
Berisha kritikoi gjithashtu ndikimin e trafikut të drogës në ekonominë e vendit, duke argumentuar se rrënimi i euros ka goditur eksportet e bimëve medicinale dhe aromatike, të cilat, sipas tij, janë një pasuri e madhe për Shqipërinë. Ai akuzoi qeverinë për favorizimin e trafikantëve, duke lejuar pastrimin e parave përmes ndërtimit të kullave dhe betonizimit të qyteteve.
