Sherri për pronat na çon këtë herë në Tropojë, aty ku një individ, duket se ka bërë zap gjithë fshatin. Bëhet fjalë për Gëzim Bishevën, i cili jo vetëm u ka zaptuar bashkëfshatarëve tokat, por dhe ka bllokuar urën dhe rrugën e fshatit të ndërtuara me fondet e bashkisë.
Situata bëhet më e rëndë, kur Gëzim Bisheva godet me thikë dhe plagos në krahë bashkëfshatarin e tij, Hamëz Brahaj! Pas ngjarjes Bisheva largohet ndërsa Brahaj qëndron i gjakosur në vijën vaditëse qe po punonte.
Teksa Policia ishte vënë në ndjekje të tij për plagosjen e Hamëz Brahajt, efektivët gjetën në banesën e Bishevës, një arsenal armësh të rënda, përfshirë një mitraloz dhe dy automatikë! Po ashtu dhe veshje ushtarake. Ndërkohë dhe sot e kësaj dite Prokuroria dhe Policia ende nuk ka mundur ti japë përgjigje pyetjes se për çfarë i donte Bisheva armët!
Fillimisht, Prokuroria e Kukësit ngriti dy akuza ndaj Gëzim Bishevës, Prodhimi dhe shitja e armëve ushtarake dhe municionit dhe plagosje e lëndë me dashje, por këto akuza ranë dhe Bisheva lë burgun dhe lihet në masën e sigurisë detyrim paraqitje! Duke u kthyer sërish në fshat, aty ku nuk ka konflikt vetëm me Hamëz Brahajn por dhe pjesën tjetër të fshatit! Dhunës nuk i ka shpëtuar as një 80-vjeçar, i cili u rrah me grushte nga Bisheva!
Ndërsa Bashkia e Tropojës, duket se është dorëzuar përballë Gëzim Bishevës, dhe pse ky i fundit ka zaptuar tokat, bllokuar urën e ndërtuar me fondet e bashkisë si dhe përvetëson shtratin e përroit. Prokuroria e Kukësit që prej vitit 2019, ia pason topin bashkisë për të zgjidhur konfliktet mes Brahajt dhe Bishevës sa i përket problemeve të pronësisë.
Dhe pse e pritëm për më shumë se tre orë kryetaren në detyrë të Bashkisë së Tropojës, Zyra Islamaj ajo nuk erdhi! Ndërsa administrata e bashkisë ishin larguar njëri pas tjetrit pa u mbyllur orari zyrtar! Meqë nuk e gjetëm në zyrë vendosëm ta telefonojmë dy ditë më pas zonjën Islamaj, por kjo e fundit e kthen situaten në qesharake pasi hap telefonin dhe nuk përgjigjet sapo mëson se kush jemi dhe pse e kemi telefonuar.
Një bashki që nuk u përgjigjet qytetarëve dhe dorëzohet përballë një individi, i cili mesa duket përveç bashkëfshatarëve ka bërë zap dhe insitucionet vendore dhe ato të drejtësisë. Nëse kjo situatë vazhdon kështu, atëherë në lagjen Muratajt ë bashkisë së Tropojës situata do të agravojë dhe më tej, ndërsa banorët ndihen të kërcvënuar nga Bisheva dhe të harruar nga shteti, i cili ka për detyrë që jo vetëm tu ofrojë siguri, por dhe të iu japë të zgjidhje problemeve që nga mungesa e funksionimit të instutucioneve po shkojnë drejt gjakderdhjes./ Piranjat
