Diplomati Agim Nesho deklaron se kryeministri Edi Rama nuk është një personalitet që ka zhvilluar Shqipërinë, por vlera e tij qëndron në kapjen e shtetit.
Sipas Neshos, Shqipëria ndodhet në një situatë të rëndë, ku qytetarët po largohen masivisht dhe vendi drejtohet nga një qeveri që kontrollon çdo gjë.
Ai tha se opozita ka organizuar protesta sepse populli ndjen revoltë, ndërsa demonstrata e korrikut ishte më e madhe në raport me popullsinë e mbetur sesa ajo e Beogradit.
Nesho akuzoi Ramën se blen vota dhe ushtron presion mbi administratën për të fituar zgjedhjet.
Ai e cilësoi qeverisjen aktuale si një “show politik”, ku gjithçka është e planifikuar për të manipuluar votat. Sipas tij, opozita e bashkuar ka një program të qartë, por Rama vazhdon të mbështetet tek oligarkët për të ruajtur pushtetin.
“Flitet për parti personaliteti, unë dua të them që Rama nuk është ndonjë personalitet.
Vlera e tij e madhe është që ka kapur shtetin shqiptar, jo se është ndonjë personalitet që ka zhvilluar shoqërinë shqiptare dhe shtetin me ide.
Prandaj, kur vjen në nivelin e këtyre njerëzve, që dua të them në parantezë, na kanë zënë derën, është fatkeqësi shumë e madhe kjo, sepse duket me ngjyra të bukura nga larg, por ta shikosh në Shqipëri, se çfarë i ka sjellë këtij vendi Rama, përveç zbukurimeve dhe disa ndërtimeve me paratë e krimit të organizuar, nuk i ka sjellë ndonjë gjë tjetër.
Nga Shqipëria kanë ikur 1 milion e ca veta, prandaj edhe ato demonstrata që ka bërë opozita i ka bërë sepse e ka ndjerë i gjithë populli që ka mbetur këtu.
Demonstrata e korrikut ishte, në përpjesëtim me popullsinë e mbetur në Shqipëri, më e madhe sesa ajo e Beogradit.
Këtu ka dhimbje të tmerrshme, por kemi një shtet që ka kapur çdo gjë, prandaj dalim, dhe edhe blerja e këtyre njerëzve që bën Rama është brenda asaj ceremonie të një ngjarjeje të parashikuar prej tij.
Rama mendon për të gjitha zgjedhjet dhe hyn në këto zgjedhje duke menduar dhe llogaritur të gjitha gjërat me para. Ai mendon se të gjitha zgjedhjet në Shqipëri janë ose me vota të blera ose me presion mbi administratën civile për vendet e punës, dhe dihet se Shqipëria nuk ka mundësi tjetër, nuk ka një klasë të mesme.
Në gjithë këtë aspekt, kjo që bën Rama është pjesë e një show të madh politik, ku Rama ka menduar se edhe këto zgjedhje, ashtu si zgjedhjet e mëparshme, do t’i manipulojë.
Dhe po ta shikosh, ka një lloj vetëbesimi, sepse asnjë lider në botë nuk futet në zgjedhje pa një program politik, siç e ka opozita e bashkuar, e cila përballon të gjitha heshtjet që i duhen zhvillimit të shoqërisë, por ky vazhdon me tallavanë e tij sepse e ka kopsitur me oligarkët.“- tha Nesho në “Çim Peka Live”.
