Kryetari i Bashkisë së Stambollit, Ekrem İmamoğlu, kundërshtari kryesor politik i presidentit Recep Tayyip Erdoğan, është arrestuar nga autoritetet turke si pjesë e një hetimi për lidhjet e dyshuara me korrupsionin dhe terrorizmin.
Mediat turke raportojnë se Prokuroria ka lëshuar urdhër-arrest për kryebashkiakun e Stambollit dhe rreth 100 persona të tjerë. Mes të arrestuarve është edhe bashkëpunëtori i ngushtë i İmamoğlu, Murat Ongun, si dhe disa gazetarë dhe biznesmenë.
Autoritetet kanë mbyllur disa rrugë rreth Stambollit dhe ndaluan demonstratat në qytet për katër ditë në një përpjekje të dukshme për të parandaluar protestat pas arrestimit.
Kritikët thonë se goditja vjen pas humbjeve të konsiderueshme nga partia në pushtet e Erdoganit në zgjedhjet lokale në mars, mes thirrjeve në rritje për zgjedhje të parakohshme kombëtare. Ekrem İmamoğlu është arrestuar në banesën e tij.
Sipas Prokurorisë, ndaj İmamoğlu dhe personave të tjerë për të cilët është lëshuar urdhër arrest rëndojnë akuza të tilla si “organizatë kriminale, zhvatje, ryshfet, mashtrim, manipulim tenderash dhe ndihma e organizatës terroriste PKK/KCK”.
Arrestimi i Ekrem İmamoğlu erdhi një ditë pasi Universiteti i Stambollit anuloi diplomën e tij, me pretendimin se është false. Sipas universitetit, diploma përmban “gabime të dukshme”. Diploma nga Universiteti Amerikan Girne (GAU) në Qipron Veriore e lejoi atë të regjistrohej në Universitetin e Stambollit në vitin 1990, por që mund të mos konsiderohet e vlefshme në Turqi.
Marrja e diplomës universitare është një nga kërkesat për të kandiduar për president të Republikës dhe Imamoglu kishte shpallur tashmë synimin e tij për të marrë pjesë në zgjedhjet e ardhshme.
Kryebashkiaku i Stambollit e quajti të paligjshëm vendimin e universitetit, duke argumentuar se bordi drejtues nuk kishte të drejtë të anulonte diplomën dhe një vendim i tillë i takonte vetëm “Bordit të Drejtorëve të Administrimit të Biznesit”, fakultetit ku ai studionte.
Dyshohet se anulimi i diplomës është bërë me urdhër politik që Ekrem İmamoğlu ta kishte të pamundur për të kandiduar në zgjedhjet e ardhshme.
