Analisti Andi Bushati tha se arrestimi i Veliajt s’do ndikojë në rezultatin e PS-së në zgjedhje, pasi në Shqipëri s’ka zgjedhje por rezultat të paracaktuar.
Sakaq, Bushati mendon që arrestimi i Metës do t’i kushtojë opozitës, ku veprimi i SPAK-ut në fund shkon në favor të Ramës.
Sipas Bushatit SPAK iu kundërpërgjigj mediave pro Veliajt po me shantazh, që vendosi një ekuilibër mes tyre.
“Pajtohem me këtë mendim të znj.Gjylameti, por për arsye krejt të kundërta, sepse mendoj që Shqipëria është një vend që s’ka zgjedhje, dhe një aferë apo arrestimi i një njeriu që ka vlerë, s’ndikon në rezultatin e paracaktuar të zgjedhjeve. Znj.Gjylameti ka të drejtë që thotë s’do ndikojë arrestimi i Veliajt më 11 maj. Duket se ka një luftë të hapur mes kryebashkiakut në detyrë dhe SPAK-ut. Vijimi për ta përgjuar në burg, për ta zhytur me çdo kusht, duket sikur ka diçka përtej SPAK-ut. Dikur sikur ka një vullnet për kryqëzimin e një njeriu. Ka diçka që duket sikur është vendosur që Veliaj të jetë në burg. Këtë e vërtetoi burgosja e tij, dhe përgjimet që betonizuan burgosjen e tij. Ra heshtja sepse SPAK-u i vuri përballë një dileme, që ne po ju përgjojmë që jeni ushtar të Veliajt, me pagesat e Veliajt. Ishte një shantazh që vuri ekuilibër, sepse edhe mediat pro Veliajt donin të shantazhonin SPAK-un, dhe SPAK-u u përgjigj me të njëjtën mënyrë”.
“Arrestimi i Veliajt s’do i kushtojë asnjë votë PS-së, ndërsa arrestimi i Metës do t’i kushtojë opozitës. I gjithë veprimi i SPAK-ut shkon në favor të Ramës në fund”.
Bushati mendon që kryeministri Edi Rama po e faktorizon Bashën, duke përdorur ironinë dhe sarkazmën.
“Një mandat i katërt për Ramën do jetë dramatik për opozitën zyrtare. Rama po mundohet ta faktorizojë Bashën, siç është në të drejtën e tij që të faktorizojë çdo segment jashtë opozitës reale të vendit. Por po e faktorizon duke e ironizuar, me sarkazëm, dhe njeriu merr mbi vete atë imazh që ka lënë për një kohë të gjatë mbi vete, kështu që s’e di sa efekt do jetë”.
