Kolegji i Posaçëm i Apelimit, KPA shpalli të mërkurën më 12 mars vendimin për konfirmimin në detyrë të prokurores se Lushnjës, Merita Selimi. Vendimi u mor me shumicë votash nga trupi gjykues i KPA i kryesuar nga Rezarta Schuetz, me relatore Ina Ramën dhe anëtare Albana Shtylla, Mimoza Tasi e Natasha Mulaj, pas shqyrtimit në dhomë këshillimi të ankimit të Selimit.
Prokurorja e Lushnjës, Merita Selimi u shkarkua nga detyra më 27 korrik 2023, pasi shumica e trupës së Komisionit të Pavarur të Kualifikimit, KPK e konkludoi se kishte probleme penalizuese në kriterin e pasurisë.
Ankimi i Selimit ndaj vendimmarrjes së KPK është gjetur i drejtë nga shumica e trupit gjykues të KPA, që me shumicë votash e ndryshoi dhe e ktheu në detyrë këtë subjekt rivlerësimi.
Merita Selimi e filloi karrierën në sistemin e drejtësisë në vitin 1992 dhe prej atëherë punoi në Prokurorinë e Lushnjës. Së fundmi, pas konfigurimit të hartës së re gjyqësore, ajo e ushtroi funksionin në Prokurorinë e Fierit.
