Gjykata e Posaçme e Apelit ka shtyrë për të dytën ditë me radhë vendimin për Erion Veliajn dhe biznesmenët Elman Abule, Shkëlqim Fusha, Gentian Sula dhe Meriman Palushi, të cilët kërkojnë ndryshimin e masës së sigurisë.
Seanc e sotme ka zgjatur për rreth 3 orë dhe në fund të saj, gjyqtari i Apelit të Posaçëm, Engert Pëllumbi njoftoi se vendimi do të shpallet ditën e nesërme në orën 10:00.
Gjatë seancës së sotme në Apel, Erion Veliaj kundërshtoi provat e reja të dorëzuara nga prokurorët e SPAK, Ols Dado dhe Altin Dumani, të cilët kërkojnë vazhdimin e masave “Arrest me burg”. Ai kërkoi që të pranishme në sallë të ishin edhe mediat.
“Keni sjell “prova të reja”, kërkoj të sillni kamerat dhe kjo seancë të jetë e hapur për median. Silllni mediat që t’i deklaroj publikisht edhe para tyre përgjimet e kryera ndaj meje. Nuk kam asnjë sekret në bisedat e telefonike me familjarët e mi nga kabina burgut. Më izoluat 1 muaj në burg që të gjenit “prova të reja. Saliu e ofendoi SPAK dhe e akuzoi si organizatë kriminale, çfarë e gjeti? Pse nuk u konsideruan prova të reja sulmet e Berishës ndaj SPAK?”, ka thënë Veliaj.
Burime bëjnë me dije se provat e reja që SPAK dorëzoi një ditë më parë kanë të bëjnë me përgjime ambjentale brenda në burg dhe përgjimet telefonike të kryera mbi Arbër Veliaj, të cilat përforcojnë argumentet pse kryebashkiakut të Tiranës duhet të vazhdojë të qëndrojë në masën e “Arrestit me burg”.
Sipas SPAK, Veliaj ka nisur një fushatë mediatike kundër prokurorëve dhe anëtarëve të tjerë të grupit hetimor, veprim ky që pretendohet se është i paligjshëm pasi ka si qëllim indimidimin e njerëzve të drejtësisë.
Erion Veliaj dhe biznesmeni shqiptaro-belg Elman Abule, të cilët janë të vetmit në këtë dosje në masën “Arrest me burg”, kërkojnë lirimin në Apel, duke ofruar garanci pasurore dhe bllokim të pasaportave për të mos dalë jashtë vendit.
Dy avokatët e Erion Veliaj, Ermir Beta dhe Artur Selmani, kanë deklaruar në gjyq se masa e sigurisë “arrest në burg” për të duhet të shfuqizohet, dhe se kryebashkiakut të Tiranës t’i jepet mundësia të dalë nga paraburgimi për të ushtruar detyrën. Sipas tyre, Veliaj nuk ka asnjë rrezik të prishë provat apo t’i dëmtojë ato si dhe as të intimidojë dëshmitarët.
Ndërkohë, biznesmenët Shkëlqim Fusha, Gentian Sula dhe Meriman Palushi kërkojnë heqjen e masave “detyrim paraqitjeje” ndaj tyre të caktuara nga GJKKO.
Kujtojmë se në seancën e djeshme, e cila zgjati për reth 7 orë, shkoi për të marrë pjesë si vëzhgues edhe avokati amerikan Joshua Roberts, përfaqësues i studios ligjore amerikane “Kasowitz Benson Torres LLP”, e cila po këshillon kryebashkiakun Erion Veliaj, por nuk u lejua të futet.
Pas një hetimi 1 vjeçar të SPAK, mbi Erion Veliajn janë ngritur akuzat për kryerjen e veprave penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminal”.
Nën hetim është dhe bashkëshortja e tij, Ajola Xoxa, ndaj së cilës, GJKKO ka caktuar masat e sigurisë “Detyrim paraqitje” dhe “Ndalimi i daljes jashtë shtetit”. Fillimisht ndaj saj, ishte caktuar masa “Arrest në shtëpi”. Po ashtu, me msaë sigurie “detyrim paraqitje” janë dhe biznesmenët Fatmir Bektashi dhe Sokol Kryeziu.
Biznesmeni shqiptaro-belg Elman Abule është i dyshuar për kryerjen e veprës penale të “Pastrimi i produkteve të veprës penale ose veprimtarisë kriminale”, kryer në bashkëpunim. Ndërkohë, 5 biznesmenët e tjerë Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu akuzohen për kryerjen e veprës penale të “Korrupsioni aktiv i funksionarëve të lartë shtetërorë ose të zgjedhurve vendorë”.
Nga hetimi i SPAK ka rezultuar se Erion Veliaj dhe Ajola Xoxa kanë krijuar një skemë përfitimi ryshfetesh për pasurim personal përmes një numri organizatash dhe kompanish të kontrolluara prej tyre apo të afërmve të tyre dhe kanë përfituar së paku 1.1 milionë euro në nëntë raste. Veliaj akuzohet se ka përfituar tre vila në një fshat turistik në Qerret ndërsa Xoxa akuzohet se ka shpenzuar rreth 800 mijë euro në blerje online, të cilat nuk i ka deklaruar në deklaratat vjetore.
Biznesmenët Elman Abule, Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu në këmbim të tenderave nga Bashkia e Tiranës dhe lejeve të ndërtimit, i ofronin Erion Veliajt, shuma monetare nëpërmjet blerjeve fiktive, biletave avioni, sponsorizimeve, OJF-ve të Ajola Xoxës, si dhe pasurive të paluajtshme, si disa vila në Qerret.
Erion Veliaj pretendon se burgosja e tij është e paligjshme, teksa që prej 10 Shkurtit, ka sulmuar vazhdimisht magjistratët e çështjes së tij, prokurorin Ols Dado dhe gjyqtarin Erion Bani. Po ashtu, edhe Edi Rama ka sulmuar drejtësinë, duke mbajtur një qëndrim ndryshe nga ai që ka mbajtur me socialistët e tjerë që kanë patur probleme me drejtlsinë.
