Ministria e Financave, konkretisht Drejtoria e Pagesave dhe Dëmshpërblimeve, ka publikuar më 29 janar 2025 një listë me 45 emra të të përndjekurve politik të dënuar me burg apo me dënim kapital, të cilëve ju lind e drejta për dëmshpërblim. E drejta për dëmshpërblim në rastet kur të dënuarit kanë ndërruar jetë, u kalon trashëgimtarëve. Sipas njoftimit dokumentat duhet të paraqiten brenda afatit tri mujor nga data e publikimit. Në njoftimin që sqaron dokumentacionin që duhet të paraqes secila kategori, drejtoria e pagesave dhe dëmshpërblimeve, në ministrinë e Financave, përcakton:
“E RËNDËSISHME: Në rastet kur ish-i përndjekuri nuk jeton më, një dosje quhet e rregullt dhe e gatshme për tu paguar, vetëm atëherë kur të gjithë trashëgimtarët pa përjashtim, do të kenë dorëzuar (postuar) dokumentacionin e përmendur më lart për të gjitha rastet e trashëgimisë. Në të kundërt askush nuk mund të paguhet i veçantë, derisa i gjithë dokumentacioni i dosjes të jetë i plotë për të gjithë”.
Pra, nëqoftëse një trashëgimtar për një arsye apo një tjetër, nuk paraqet dokumentet e tij, përjashton nga dëmshpërblimi të gjithë pjesëtarët e tjerë??
Lidhur me këtë pikë në emisionin “Xhadat” mbërriti denoncimi i trashëgimtarit të një familje të persekutuar, gjyshi i të cilit kishte bërë disa vite burg. Denoncuesi u shpreh se pika e vendosur në njoftimin për dëmshpërblim, ishte diskriminuese dhe një pengesë në procesin e dëmshpërblimit, që kishte 35 vjet që zvarritej.
Pas marrjes së denoncimit “Xhadat” realizuan një intervistë me kryetarin e Unionit të të Përndjekurve Politik, Besim Ndregjoni. Sipas tij drejtoria e dëmshpërblimeve, nuk ka të drejtë të dalë mbi ligjin, ç`ka duket se ka ndodhur në këtë rast.
Trashëgimtarët e të përndjekurve ju thanë “Xhadave„ se kanë kërkuar dhe me e-mail sqarime në Ministrinë e Financës, por nuk kanë marrë asnjë përgjigje.
“Xhadat” kërkuan informacion nga ana e Ministrisë së Financës në lidhje me këtë pikë. Në përgjigje ministria deklaroj se ky referim i dedikohej përcaktimeve nga ana e tyre në lidhje me pagesat e plota dhe të pjesshme të dëmshpërblimeve për çdo dosje dhe individë. Pra, konsiderimit nga ana ligjore kur një dosje konsiderohet e plotë dhe kur e pjesshme.
Ky përcaktim nuk kushtëzon trashëgimtarët, të cilët në çdo rast mund të paguhen në mënyrë periodike dhe të veçantë- tha ministria.
Kështu pas interesimit të “Xhadave” drejtoria e dëmshpërblimeve hodhi poshtë atë që vetë kishte shkruar , shprehimisht:
“Askush nuk mund të paguhet i veçantë, derisa i gjithë dokumentacioni i dosjes të jetë i plotë për të gjithë”.
