Pak ditë para se Sekretari i Përgjithshëm i NATO-s, Mark Rutte, ta vizitojë Kosovën, më 11.03.2025, kryeministri i Kosovës, Albin Kurti është takuar me komandantin e KFOR-it, gjeneralmajorin Enrico Barduani.
Sipas Zyrës së Kryeministrit, gjatë takimit kryeministri Kurti dhe gjenerali Barduani kanë diskutuar për përgatitjet për këtë vizitë të rëndësishme të Rutte në Kosovë dhe për çështjet e sigurisë dhe bashkëpunimin e vazhdueshëm mes institucioneve të Kosovës dhe misionit të NATO-s.
“Qeveria e Kosovës bashkëpunon ngushtë me misionin e NATO-s në Kosovë, KFOR-in, për forcimin e sigurisë dhe paqes në rajon” – ka theksuar ZKM më 07.03.2025.
Sekretari i Përgjithshëm i NATO-s, Mark Rutte, zëvendësja e tij, Radmila Shekerinska, së bashku me ambasadorët e Këshillit të Atlantikut të Veriut do të vizitojnë Kosovën më 11 mars.
Gjatë kësaj vizite, Rutte do të ketë takime me kryeministrin e Kosovës, Albin Kurti, dhe presidenten Vjosa Osmani. Me këtë të fundit do të mbajë edhe një konferencë të përbashkët për media.
