Eksperti i kriminalistikës, Ervin Karamuço, duke diskutuar nëse janë përgjuar anëtarët e Gjykatës Kushtetuese nga SPAK, tha se prokuroria mund të ketë patur indicie nga brenda gjykatës.
Sipas tij, mund të ketë qenë ndonjë person në GJK që mund të ketë përcjellë informacion në prokurori.
“Aty ka një gjë që nuk është sqaruar dhe mendoj se mbahet sekret edhe për shkak të mënyrës se si janë zhvilluar veprimet deri në regjistrimin e një procedimi penal. Po të mos ishte hapur kjo histori, ne nuk do të kuptonim dot ose edhe vetë prokurorët nuk do të ishin në atë lloj qëndrimi që janë sot, që duhet të jesh i kujdesshëm kur regjistron një procedim penal kryesisht. Pra nga se nisesh, çfarë indicie ke? Kjo duhet dokumentuar, kam të dhëna nga kush? Nga SHISH, nga një anëtar i GJK që nuk do të bëjë kallëzim për kolegët por çon një informacion. E dokumenton këtë informacion, e mban sekret, por ndërkohë regjistron një procedim kryesisht sepse ndodhet mes kolegësh. Dhe kjo e dyta kam përshtypjen se ka ndodhur.
Shprehet diku edhe aty se dikush është intimiduar nga dikush tjetër. Dhe për këtë hajde se po e marrim në përgjim anëtarin e Gjykatës Kushtetuese, jo se do të bëjë diçka të paligjshme por të shikojmë se kush hyn në këtë interaktivitet dhe kush e intimidon.
Në fakt në atë kohë kemi diskutuar që filloi një valë e madhe shantazhi ndaj disa prej anëtarëve të Gjykatës Kushtetuese, duke iu nxjerrë edhe gjëra private. Në atë kohë ishte kjo dosje. Këto gjëra mund t’i marrë prokuroria, mund të jetë një nga indiciet që ka prokuroria, pse po shantazhohen anëtarët e GJK. Ka të drejtë të shikojë me vëzhgim ambiental. “, tha Karamuço.
