Barcelona ka plot yje dhe talente, por ende nuk është një skuadër 100% e kompletuar, sepse disa role nuk janë të dubluara. Problemi kryesor në merkaton e verës do të jetë reparti i mbrojtjes.
Cubarsi është e sigurt se do të konsiderohet titullar për shumë vite, si e ardhmja e defensivës katalanase, por dilema është se kush duhet të jetë partneri i tij në qendër.
Christensen është drejt largimit, me vetëm një vit të mbetur në kontratë, kurse Eric Garcia asnjëherë nuk është cilësuar kandidat për formacionin.
Kalojmë tek Inigo Martinez, i cili pritet të rinovojë kontratën edhe për një sezon tjetër. Veterani i mbrojtjes e pranon lehtësisht rolin si zëvendësues.
Ronald Araujo, ndërkohë, ka rinovuar deri në vitin 2031 dhe ka klauzolë largimi 65 mln euro. Kjo duket si një shifër e cila paracakton fatin e tij: nëse Barcelona tenton ta zëvendësojë me dikë tjetër, ai largohet lirisht, sepse 65 mln euro sot nuk janë shumë për klubet e mëdha europiane.
Interesimi i Barcelonës për Jonathan Tah ka krijuar një problem në “Camp Nou”. Edhe pse gjermani do të afrohej me parametra zero, Araujo do të kërkojë garanci për formacionin.
Hansi Flick e pëlqen lojtarin e kombëtares gjermane, por nuk do të rrezikojë të humbë një lojtar si Araujo, i cili gëzon interesin e disa klubeve big në Europë.
Pyetja që lind është e thjeshtë: a është Barcelona në kushtet që t’i lejojë vetes tre qendërmbrojtës të kalibrit botëror dhe njëkohësisht të mos ketë një sulmues rezervë për veteranin Lewandowski?
Kjo epokë ndoshta ende nuk ka ardhur, sepse financat e klubit katalanas nuk janë më të mirat e mundshme. Problemet ekonomike duan edhe pak kohë që të gjejnë zgjidhje.
