Komisioni i Ankimeve dhe Sanksioneve pranë KQZ kërkoi rishqyrtimin e një ankese ndaj mitingut të zhvilluar nga kryeministri Edi Rama me punonjësit e Bashkisë si në shkelje të Kodit Zgjedhor.
Për t’i shpëtuar ndalimeve që vendos Kodi Zgjedhor për aktivitetet politike para zgjedhjeve, kryeministria i dërgoi Komisionit Qendror të Zgjedhjeve në 14 shkurt njoftimin për një aktivitet të kryeministrit Edi Rama me rastin e “Ceremonisë së Hapjes “Tirana, Kryeqyteti Mesdhetar i Kulturës dhe Dialogut 2025”. Aktiviteti u njoftua të zhvillohej në 20 shkurt në orën 16.00 në prani edhe të funksionarëve të huaj.
Por ndryshe nga njoftimi në KQZ, të enjten e 20 shkurtit Rama mblodhi në “Sheshin Skënderbej” mijëra punonjës të Bashkisë së Tiranës, që u rreshtuan në kuadrate ndërsa kishin të veshur uniformat e punës. Ndryshe nga njoftimi, Rama e përdori tribunën për të dhënë mesazhe elektorale, ndërsa sulmoi kundërshtarët, kritikët dhe gazetarët dhe cilësoi arrestimin e kryebashkiakut Erion Veliaj si të bërë “pa gjyq”.
I vënë në lëvizje nga ankimi i organizatës “Qëndres Qytetare”, e cila i pati kërkuar KQZ ta ndalonte aktivitetin, Komisioni i Ankimeve dhe Sanksioneve gjeti të enjten se përmbajtja e aktivitetit ishte e ndryshme nga ajo që ishte njoftuar. KAS gjeti se aktiviteti i 20 shkurtit 2025 i zhvilluar në orën 16.30 ishte “i ndryshëm nga ai që u raportua në KQZ”. Komisioni prishi vendimin e Komisionerit Shtetëror të Zgjedhjeve që pati rrëzuar ankimin e “Qëndresës Qytetare” për bllokim të mitingut dhe kërkoi që rasti të rishqyrtohej.
I pyetur nga BIRN, Rigels Xhemollari nga Qëndresa Qytetare tha se Komisioneri Shtetëror i Zgjedhjeve duhej të rimerrte në shqyrtimin ankimin e tyre dhe rekomandonte gjobë ndaj kryeministrisë për mosraportim të aktivitetit.
“Sot hodhëm hapin e parë drejt ndëshkimit të kryeministrit të vendit për tubimin në sheshin për para bashkisë. Një veprim i cili ishte i paraportuar në KQZ, por edhe një veprim në gjykimin tonë përdorte burimet dhe punonjësit e administratës së bashkisë”, tha Xhemollari.
Ai tha se vendimi i KAS ishte një mesazh se kushdo prej zyrtarëve qoftë edhe kryeministri “do duhet t’i nënshtrohet rregullave të administrimit zgjedhor”. Kryeministria nuk iu përgjigj një kërkese për koment deri në publikimin e këtij shkrimi./BIRN
