As arrestimi i Erion Veliajt nuk ka ndalur skandalet financiare në Bashkinë e Tiranës. Përkundrazi, duket se skemat e dyshimta vazhdojnë pa asnjë pengesë. Rasti më i fundit lidhet me një tender të dhënë për blerjen e uniformave dhe veshjeve speciale për Policinë Bashkiake, i cili ka një vlerë marramendëse prej 615 milionë lekësh të vjetra me TVSH.
Ky tender, i shpallur nga Bashkia e Tiranës me referencën REF-32897-12-11-2024, kishte një fond limit prej 620 milionë lekësh të vjetra me TVSH.
Fituesja e shpallur, Vojsava Zenelaj, ka dhënë një ofertë që përkon pothuajse plotësisht me fondin e përcaktuar nga vetë bashkia, me një diferencë të papërfillshme prej vetëm 5 milionë lekësh të vjetra. Me fjalë të tjera, oferta fituese përbën 99.2% të fondit limit, një rastësi e rrallë që zakonisht ndodh vetëm kur gara është fiktive dhe fituesi dihet që në fillim.
Dyshimet për manipulim bëhen edhe më të forta kur shohim se në këtë tender kanë marrë pjesë vetëm dy kompani, nga të cilat njëra nuk ka dorëzuar fare ofertë. Kjo praktikë është një skemë e njohur për të simuluar konkurrencën, ndërkohë që në realitet tenderi shkon tek kompania e caktuar paraprakisht.
Ironia është e madhe: ndërsa kreu i bashkisë ndodhet pas hekurave për abuzime me tenderat, stafi që ka mbetur pas vazhdon me të njëjtat metoda të vjetra, sikur të mos ketë ndodhur asgjë.
Pyetja që shtrohet tani është: a do të veprojë SPAK për të ndalur këtë rrjedhje të pandalshme parash publike, apo uniformat e reja të Policisë Bashkiake do të jenë aq të “shtrenjta” sa të ofrojnë imunitet për fituesit e këtyre tenderave?
Bashkia Tiranë duket se nuk ka ndërmend të ndalojë, pavarësisht skandaleve të njëpasnjëshme. Me këto ritme, ndoshta herën tjetër mund të shohim edhe një tender për uniforma të reja me xhepa të zgjeruar – të përshtatshme për të mbajtur më shumë para të taksapaguesve!/JOQ
