Në aksident i rëndë automobilistik është regjistruar mesnatën e kaluar, rreth orës 00:10 në aksin rrugor Prrenjas-Librazhd, pranë fshatit Pishkash.
Burime bëjnë me dije se një automjet tip “Benz” është përplasur me një kamion me targa të Shkupit. Si pasojë e aksidentit ka mbetur i plagosur drejtuesi i “Benz-it”, shtetasi Zef Sinani, rreth 34 vjeç, ndërsa ka humbur jetën një grua, pasagjere në automjet me të.
I plagosuri është dërguar me urgjencë fillimisht në spitalin e Librazhdit dhe më pas në Spitalin Rajonal të Elbasanit. Ndërsa trupi i viktimës është transportuar në morgun e Elbasanit.
Nga hetimet paraprake dyshohet se shkaku i aksidentit mund të ketë qenë shpejtësia e lartë, tej normave të lejuara, në një kthesë të fortë në Pishkash.
Grupi hetimor po punon për zbardhjen e plotë të rrethanave të aksidentit.
