Kreu i Bashkisë së Tiranës, Erion Veliaj u arrestua ditën e sotme me urdhër të SPAK, pas një hetimi prej disa muajsh për korrupsion nga Prokuroria e Posaçme.
Edhe pse SPAK nuk ka dalë ende me një komunikatë zyrtare, thuhet se ai është i dyshuar për kryerjen e 4 veprave penale, më konkretisht:
- “Korrupsion pasiv i funksionarëve të lartë shtetërorë ose i të zgjedhurve vendorë”,
- “Korrupsion aktiv i funksionarëve të lartë shtetërorë ose të zgjedhurve vendorë”,
- “Pastrimi i produkteve të veprës penale ose veprimtarisë kriminale”,
- “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim”.
Veç masës ndaj Veliaj, GJKKO miratoi dhe masën “arrest në shtëpi” për bashkëshorten e tij, Ajola Xoxa, si dhe “detyrim paraqitje” për biznesmenët Gentian Sula, Meriman Palushi, Fatmir Bektashi, Sokol Kryeziu dhe Shkëlqim Fusha.
Arrestimi i Veliajt bëri që Edi Rama të anulonte të gjitha takimet dhe aktivitetet që kishte në axhendë gjatë ditës së sotme në Shkodër dhe të nisej me urgjencë në Tiranë. Në orën 16:00 ai ka thirrur një mbledhje të grupit parlamentar të PS-së, ku në fokus do të jetë pikërisht arrestimi i Erion Veliajt, të cilin Rama e kishte caktuar fillimisht drejtues politik për Qarkun e Tiranës për zgjedhjet e 11 Majit.
Por, a do të mbajë Edi Rama me Erion Veliajn të njëjtin standard si me ish-kryebashkiakun e Lushnjës Fatos Tushe?
Kujtojmë se kur ky i fundit u arrestua në Korrik të vitit 2021 për akuzat e shpërdorimit të detyrës dhe abuzimit në tendera, Edi Rama vendosi të distancohej menjëherë prej tij.
Një ditë pas arrestimit të Fatos Tushes nga SPAK, Rama mblodhi Qeverinë dhe e shkarkoi nga detyra për shkelje të rëndë.
“VENDIMNr. 407, datë 6.7.2021PËR SHKARKIMIN NGA DETYRA TË KRYETARIT TË BASHKISË LUSHNJË, Z. FATOS TUSHENë mbështetje të neneve 100 e 115, pika 1, të Kushtetutës, dhe të shkronjës “a”, të nenit 62, të ligjit nr. 139/2015, “Për vetëqeverisjen vendore”, të ndryshuar, me propozimin e ministrit të Brendshëm, Këshilli i Ministrave VENDOSI: Shkarkimin nga detyra, për shkak të shkeljeve të rënda, të kryetarit të Bashkisë Lushnjë, z. Fatos Tushe. Ky vendim hyn në fuqi menjëherë dhe botohet në Fletoren Zyrtare. KRYEMINISTËR Edi Rama” – ishte vendimi që u miratua nga Këshilli i Ministrave një ditë pas arrestimit të Tushes.
A do të mbajë të njëjtin qëndrim dhe me Erion Veliajn apo jo duke e shkakruar nga detyra, kjo mbetet për t’u parë.
