Gjykata e Lartë ka caktuar relatorin që do të shqyrtojë rekursin e Ilir Metës dhe Monika Kryemadhit, ku kërkojnë heqjen e masave të sigurisë të caktuara nga GJKKO me urdhër të SPAK. Nga shorti i hedhur relator është zgjedhur magjistrati Ilir Panda.
Aktualisht Ilir Meta ndodhet nën masën e sigurisë “Arrest me burg”, ndërsa Monika Kryemadhi në masën “detyrim paraqitje”, të cilat janë lënë në fuqi edhe nga Gjykata e Posaçme e Apelit.
Ilir Meta ndodhet në paraburgim e burgut “313” që prej 21 Tetorit të vitit të kaular, kur u arrestua dhunshëm nga Policia në mes të ditës, në hyrje të Tiranës, pranë “Casa Italia-s”.
Masat ndaj tij dhe Monika Kryemadhit u caktuan nga SPAK bazuar në hetimet për kontratat e konsulencës dhe lobimit në Shtetet e Bashkuara të Amerikës,, për çështjen “CEZ-DIA”, pastrimin e produkteve të veprës penale në blerjen e një shtëpie në Tiranë si dhe mosdeklarimin e shpenzimeve mjekësore për periudhën 2013-2019, të cilat janë bashkuar në një dosje të vetme.
Ndaj Ilir Metës rëndojnë akuzat për 3 veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Ndërsa ndaj Monika Kryemadhit rëndojnë akuzat për veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 2(dy) raste dhe në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Për dosjen në fjalë janë nën masën detyrim paraqitje dhe ish-kreu i AKEP, Pirro Xhixho si dhe shtetasja Ema Çoku.
