Politologu Ilir Kalemaj duke komnetuar aktualitetin politik në MCN tha deklaroi se vendimi më i mirë i Sali Berishës në PD që pas rikthimit është mbajtje e Primareve dhe mënyrën se si ato u konceptuan.
Megjithatë Kalemaj mendon që në këtë proces do të ketë të pakënaqur, ndërsa ngriti pyetjen se çfarë do të ndodhë me partitë aleate të PD-së.
Duke komentuar deklaratat nga kampi i partisë së Ilir Metës, Kalemaj mendon që kandidatët e Partisë së Lirisë do të hyjnë jashtë listës së PD-së në zgjedhjet parlamentare të 11 Majit.
Kalemaj: “Koalicione s’ka. PD e z.Berisha s’ka nevojë të bëjë atë që bëri para dy vjetësh, që shfrytëzoi logon e partive aleate. Sot PD është me votat, siglën e saj, lidershipin e saj. Berisha bëri një deklaratë për z.Meta posaçërisht, por kjo s’është pranuar nga PL, pasi z.Blushi tha që do hyjmë në zgjedhje për të marrë 20 deputetë dhe që do dalin më vete në zgjedhje. Pastaj ngrihen pyetje çfarë do ndodhë me partitë aleate të PD, ku është edhe z.Ndoka, a do hyjnë në primare apo jo. Kjo do shkaktojë një tension të madh të brendshëm të atyre që janë demokratë që kërkojnë vend në listën e sigurt. E shoh në vështirësi Berishën në këtë pjesë. Berisha ka bërë zgjidhjen më të mirë, jo vetëm me primaren, por mënyrën si i ka konceptuar. Me anë të primareve, Berisha thotë që i përmbahet statutit, është një proces demokratik, synon të galvanizojë votë dhe fiton kohë. Problemi që kanë primaret në këtë situatë ku është PD, është që natyrisht do ketë të pakënaqur në këtë proces. Çfarë do ndodh me kryesuesit e qarqeve dhe me partitë aleate. A duhet të futen aleatët në listën e mbyllur të PD, në primare, apo në listën e hapur? Berisha deri më tani s’ka dhënë indicie, s’është përcaktuar ende”.
