Për të tretën herë radhazi, Policia e Tiranës po vazhdon të konsiderojë si të paligjshme protestën e përjavshme të opozitës para Bashkisë së Tiranës, kundër Erion Veliajt.
Autoritetet kanë reaguar përmes një komunikate të shkurtër për mediat, ku bëjnë me dije se kanë proceduar penalisht 6 persona në lidhje me tubimin e mbajtur ditën e djeshme. Sipas Policisë, ata “kanë zhvilluar një protestë të paligjshme, duke bllokuar rrugën, penguar qarkullimin e automjeteve dhe qytetarëve si dhe kanë prishur rendin dhe qetësinë publike”.
Nuk dihet nëse Partia Demokratike kishte marrë leje për protestën e djeshme para godinës së Bashkisë së Tiranës, por në tre tubimet e mbajtura për këtë vit, Policia nuk ka marrë masa për devijimin e trafikut, duke sjellë përplasje të protestuesve me drejtuesit e automjeteve që janë penguar për të qarkulluar në atë aks rrugor.
“Më datë 24.01.2025, u referuan materialet në Prokurorinë pranë Gjykatës së Shkallës së Parë, të Juridiksionit të Përgjithshmë Tiranë, për shtetasit D. T., A. K., K. B., E. E., B. K., dhe T. B, pasi para godinës së Bashkisë Tiranë, në bashkëpunim me persona të tjerë të pa identifikuar, kanë zhvilluar një protestë të paligjshme, duke bllokuar rrugën, penguar qarkullimin e automjeteve dhe qytetarëve si dhe kanë prishur rendin dhe qetësinë publike.” – njofton Policia.
PD proteston para Bashkisë, përplasen me Policinë: SPAK po i jep kohë Veliaj për të kërkuar azil
