Është zhvilluar këtë të enjte seanca gjyqësore për dosjen në ngarkim të dy grupeve kriminale, të cilët vidhnin objekte luksi dhe bizhuteri në Francë dhe më pas i transportonin pa doganë në Shqipëri për t’i shitur.
Ata akuzohen për kontrabandë mallrash, mos deklarim të ardhurash, pastrim parash dhe ushtrim pa licencë të aktiviteteve financiare, teksa për këtë çështje të pandehur janë marrë dhe shoferi i ish-drejtorit të Policisë Ardi Veliut, Sokol Idrizaj, si dhe bashkëshortja e tij, Elda Idrizaj, si dhe dy vajzat e tyre Egi dhe Bora idrizaj.
SPAK kërkon 12 vite heqje lirie për Sokol Idrizajn, po aq për bashkëshorten e tij Elda Idrizaj, 10 për Egi Idrizajn dhe 6 vite për vajzën tjetër të çiftit Bora Idrizaj. Nëse kjo pretencë miratohet bga GJKKO, të pandehurit do të përfitonin zbritjen me 1/3 e dënimit për shkak të gjykimit të shkurtuar.
Gjatë seancës avokati i Sokol Idrizajt e cilësoi ngritjen e akuzës si një veprim të paprecedentë, duke theksuar se Prokuroria ka vepruar me tepër zell për të ngritur akuza ndaj një familjeje të tërë. Ai gjithashtu theksoi se Sokol Idrizaj ka një karrierë 35-vjeçare në pPlici dhe është i pajisur me certifikatë sigurie. Sipas avokatit, kjo çështje është fryrë mediatikisht, për shkak se Idrizaj ka shërbyer si shofer i Ardi Veliut.
Ndërkohë, Sokol Idrizaj, gjatë dëshmisë snë gjyq hodhi poshtë akuzat dhe theksoi se mediat kishin abuzuar me rastin, duke shpifur dhe baltosur emrin e tij dhe të familjes. Ai ka pretenduar se nuk është i pasur për faktin se çatinë e shtëpisë e ka me llamarinë.
Sokol Idrizaj: Edhe ne komunizëm nuk futej ne burg një familje e tërë, mediat kane abuzuar me rastin tim, me kane baltosur mua dhe familjen. Rrobat e sjella nga Franca nga vajza ime është konfirmuar nga vete shteti francez qe nuk janë te vjedhura. Edhe ne kohe te Enverit prokurori nuk dilte dot mbi gjyqtarin, un jetoj ne shtëpi me çatinë me llamarina ndërkohë qe akuzohemi për fshehje te ardhurash ne vlerën e miliona lekeve.
Ndërkohë, bashkëshortja e Sokol Idrizajt, Elda Idrizaj shprehu dëshpërimin e saj për këtë situatë, teksa tha se është bërë gjyshe në burg.
Elda Idrizaj: U bëra gjyshe ne burg, ne jemi familje e rregullt, vajza sillte rroba per ti shitur online me qellim per disa te ardhura me shume, na është shkaterruar jeta nga kjo histori, ç’lidhje kemi ne me grup te strukturuar kriminal.
Vajza e madhe eçifti, Egi Idrizaj, e cila është gjithashtu e akuzuar, theksoi se nëse do të kishte ditur që do të përfundonte në këtë situatë për një faqe online shitjesh, nuk do të kishte hyrë në këtë veprim. Ajo shtoi se SPAK kërkon 10 vjet burg për të, ndërkohë që ajo është nënë e një djali një vjeç.
Egi Idrizaj: Ta dija qe për një faqe online shitje do përfundoja këtu nuk do merresha, unë kam djalin 1 vjeç Prokuroria kërkon 10 vite burg.
Vajza tjetër Bora Idrizaj shprehu pasigurinë dhe trauma që ka shkaktuar kjo histori në jetën e saj.
Bora Idrizaj: Nga kjo histori kam ngelur pa pune, na është shkaktuar traume, jam vetëm 22 vjeç.
Në përfundim të seancës së sotme, Gjykata e Posaçme vendosi të shpallë vendimin më 31 Janar.
Grupi ku bënte pjesë Sokol Idrizaj, gruaja e tij dhe dy vajzat, por dhe persona të tjerë akuzohet se transportonin nga Franca në Shqipëri, bizhuteri të vjedhura dhe dhe mallra kontrabandë që kapin vlerën e rreth 2.8 mln euro. Më pas sendet e vjedhura dhe të kontrabanduara tregtoheshin në Shqipëri përmes faqeve online.
