Në datën 20 janari Donald Trump mori zyrtarisht detyrën e Presidentit të Shteteve të Bashkuara, pas inaugurimit të tij në Uashington.
Trump si President do të udhëtojë me automjetin tip ‘Cadillac One’, një makinë që konsiderohet tejet e sigurt. Kjo limuzinë presidenciale konsiderohet si mjeti më i sigurt në botë, pasi edhe njeriu që lëviz me të, konsiderohet si më i rëndësishmi në botë.
Sipas mediave të huaja, ky automjet mund t’i rezistojë një sulmi kimik, një shpërthimi zjarri dhe është i pajisur me teknologji moderne dhe armatim.
Po ashtu bëhet me dije se kjo makinë ka nisur të përdoret për herë të parë në vitin 2018 gjatë mandatit të parë të Trump.
Dyert e automjetit kanë një trashësi mbi 20 centimetër, ose të paktën sa dyfishi i dyerve normale.
Dritaret përbëhen nga 5 shtresa xhami dhe polikarbonat, gjë që i reziston edhe plumbave shpues apo të kalibrit Magnum 44.
Xhamat nuk mund të hapen, përveç xhamit të shoferit, që limitin e ka vetëm 8 centimetër. Gomat i rezistojnë çdo lloj çarjeje, prerjeje apo shpimi, madje edhe në rast se do të ishin plotësisht jashtë funksionit, automjeti është në gjendje të vazhdojë te udhëtojë.
Ndërkohë një tjetër detaj i rëndësishëm është që drejtuesi i mjetit nuk është një shofer çfarëdo, por një ushtarak i stërvitur nga shërbimet sekrete, i përgatitur për situata të vështira.
