Mbi 200 punonjës të fasonerisë “Altek” në Krujë, kanë bojkotuar edhe ditën e sotme punën.
Ata janë paraqitur në mëngjes tek godina, por refuzojnë të punojnë deri në plotësimin e kërkesave të tyre, pasi pretendojnë se iu janë shkelur të drejtat dhe kërkojnë zgjidhje të menjëhershme nga kompania.
Më konkretisht, punëtorët kërkojnë shpërblimin e fundvitit, pasi nuk iu është dhënë këtë vit nga ana e punëdhënësit, ndryshe nga vitet e tjera, duke shkelur praktikat e zakonshme dhe pritshmëritë e punëtorëve. Punonjësit pretendojnë se kjo është hera e parë që nuk e marrin shpërblimin e fundvitit prej 27 vitesh.
Mësohet se kompania “Altek” iu ka propozuar punonjësve pas diskutimeve që 60% e pagesës të bëhet brenda javës dhe pjesa tjetër në muajt në vijim, por kjo gjë nuk është pranuar nga ana e punonjësve.
Punonjësit e fasonerisë “Altek” pretendojnë se shpërblimi nuk është i njëjtë për të gjithë, por jepet në bazë të pagës dhe orëve të punës, duke u ndarë në kategori të caktuara.
Gjithashtu, ata kërkojnë dhe rikthimin e shtesës prej 25% për orët shtesë dhe ditët e festave, që aktualisht po paguhen si orë normale pune, në kundërshtim me Kodin e Punës.
Punëtorët fasonerisë “Altek” theksojnë se këto janë të drejta minimale të garantuara ligjërisht dhe mungesa e tyre ka rënduar ndjeshëm situatën ekonomike të familjeve të tyre.
Protestuesit kërkojnë plotësimin e dy kërkesave të mësipërme, teksa kërkojnë dhe ndërhyrjen e institucioneve shtetërore për të siguruar respektimin e të drejtave të punëtorëve dhe standardeve ligjore të punës. Ata pretendojnë se përfaqësuesit e Inspektoriatit Shtetëror të Punës kanë mbajtur qëndrim në favor të kompanisë.
Punonjësit e fasonerisë “Altek” kanë bojkotuar punën dhe vijojnë protestën që prej ditës së pretme, teksa shprehen se do të vijojnë të protestojnë deri në marrjen e shpërblimit të plotë dhe respektimin e Kodit të Punës.
Sipas deklarimeve në Qendrën Kombëtare të Biznesit, “Altek shpk” ushtron aktivitet në ish-ndërmarrjen Artistike të Krujës. Ajo u themelua në vitin 1995 nga familja italiane Cosimo Vitobello si filial i kompanisë së tyre në Barletta, Puglia (Itali). Veprimtaria kryesore mbetet import-eksporti i materialeve për prodhimin e këpucëve.
Filiali ka ndryshuar dy herë pronësi, por pa u larguar nga zotërimi familjar i Francesco, Giuseppe, Matteo dhe Felice Vitobellos. Në vitin 2005 i kaloi “Calzaturificio Odeon Shoes” ndërsa në vitin 2018 u ristrukturua nën pronësi të “Agricovit”.
