Kreu i Partisë Demokratike, Sali Berisha do të paraqitet ditën e sotme, në orën 10:00 në Prokurorinë e Posaçme (SPAK) për të zbatuar masën e sigurisë “detyrim paraqitje” të caktuar më 3 Janar nga Apeli i Posaçëm.
Edhe pse e ka konsideruar si një vendim antikushtetues dhe politik, Berisha ka deklaruar se do ta zbatoj vendimin e gjykatës, duke shtuar se Kuvendi tashmë e ka dhënë autorizimin për arrestimin e tij.
“E kam bërë të qartë, që unë, gjersa është një proces që buron nga parlamenti, do paraqitem. Nuk kam kërkuar gjë tjetër, vetëm parlamentin. Këtu nuk ka nevojë sepse parlamenti ka dhënë një autorizim për arrestimin tim” – ka deklaruar Berisha.
Lideri demokrat e ka konsideruar të pa kuptim paraqitjen në SPAK, ndërkohë që dosja për privatizimin e ish-klubit “Partizani” ka shkuar në gjykatë.
“Vendim kryekëput politik. Unë e dija që ishte politik, nuk kisha asnjë dyshim sepse dosja është dorëzuar në gjykatë dhe sipas të gjitha ligjeve unë kam punë me gjykatën, jo me prokurorinë. Por Skapistët të tmerruar nga denoncimet e mia, që janë vetëm maja e ajsbergut se unë do paraqes të gjithë nomenklaturën e diktaturës, se ata janë pjesë e nomenklaturës së diktaturës. Nuk merresha me ta po të mos ishin të tillë, por janë organizatë kriminale në funksion të diktaturës.” – tha Berisha.
Kujtojmë se më 3 Janar, gjyqtari i Apelit Engert Pëllumbi vendosi që Sali Berisha të paraqitet dy herë në muaj para oficerit të Policisë Gjyqësore Adelajda Meta, të hënën e parë dhe të tretë të çdo muaji. Vendimi u mor pas shqyrtimit të ankimimit të bërë nga dy prokurorët e SPAK, Arben Kraja dhe Enkeleda Millonai, të cilët kërkonin rikthimin e “arrestit në shtëpi” për liderin demokrat.
Gjyqtari i Apelit nuk pranoi kërkesën e SPAK, por gjithashtu prishi edhe vendimin e GJKKO-së të marrë nga gjyqtarja Flojera Davidhi më 27 Nëntor, e cila i revokoi të gjitha masat e sigurisë ndaj Berishës.
Gjatë kohë që Berisha do të paraqitet në SPAK, jashtë godinës pritet të mbahet një tubim në mbështetje të liderit demokrat. Në mesazhin që Sekretari i Përgjithshëm i PD-së, FLamur Noka u ka drejtuar strukturave thuhet se demokratët duhet të protestojnë për të mbështetur të drejtën, që sipas tyre është në anën e Sali Berishës.
“Nesër, në orën 9:30, të gjithë së bashku përpara selisë së SKAP, për të protestuar kundër akteve përndjekëse që kjo vegël në duart e Ramës, bën kundrejt kundërshtarëve politikë të tij.
Do të jemi aty nesër në mbështetje të së drejtës, ligjit dhe së vërtetës, që janë në anën e liderit të opozitës, Prof. Dr. Sali Berishës. E hënë, 6 janar, ora 9:30, përpara SKAP-it”, shkruan Flamur Noka.
Ndërkohë, gjatë kohës që Berisha do të paraqitet në SPAK për zbatimin e vendimit të Apelit, paralelisht në Gjzkatën e Posaçme (GJKKO) do të zhvillohet seanca paraprake për dosjen e privatizimit të ish-kompleksit sportiv “Partizani”.
Gjyqtarja Flojera Davidhi do të marrë vendimin nëse çështja e dosjes “Partizani” do të dërgohet ose jo për gjykim. Ajo mund të dërgojë për gjykim dosjen, mund ta kthejë pas për plotësim hetimesh ose e pushon çështjen.
Për çështjen në fjalë Berisha është marrë i pandehur për akuzën e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij Jamarbër bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Kujtojmë se Sali Berisha ndodhej në izolim që prej 30 Dhjetorit të vitit 2023, kur Gjykata e Posaçme vendosi t’i caktonte masën e sigurisë “arrest shtëpie”, pasi lideri demokrat nuk zbatoi masën e mëparshme “Detyrim paraqitje”, duke e konsideruar si antikushtetuese. Pas këtij vendimi, avokatët e Berishës kishin bërë një sërë ankimimesh për t’i revokuar masën “Arrest shtëpie”, por kërkesat e tyre ishin rrëzuar si në Shkallën e Parë, po ashtu edhe në Apelin e Posaçëm.
