Kryetari i Partisë Demokratike, Sali Berisha, është prononcuar për herë të parë në lidhje me vendimin e sotëm të Gjykatës së Posaçme të Apelit, e cila i caktoi masën e sigurisë “detyrim paraqitje” dy herë në muaj në SPAK në lidhje me dosjen “Partizani”.
I pyetur nga gazetarët pas daljes nga selia blu, Berisha tha se ky vendim është pa asnjë vazë ligjore, teksa e konsideroi si një “pilulë elektorale” për kryeministrin Edi Rama, duke sulmuar edhe SPAK-un.
“Vendim pa asnjë bazë ligjore, pilulë elektorale për të pashpresin Edi Rama. Përpjekje e dështuar e organizatës kriminale që quhet Skapi i Partisë, për të justifikuar veprën e tyre dhe në këtë kontekst dëshmi e re e kontrollit të plotë dhe total të SKRAP-it nga Edi Rama, zbatimit të urdhrave të tij politik.” – tha lideri demokrat.
Edhe pse nuk e ka pritur mirë vendimin e Apelit, Berisha deklaroi se do ta respektojë, pasi sipas tij, vendimi i sotëm do t’i shtohet dosjes për çështjen në Strasburg.
“Vendimin do ta respektoj, sepse çështjen tani e kam në Strasburg. Këtë rast do e çojmë atje t’i shtohet dosjes” – tha Berisha.
Apeli: Berisha të paraqitet në SPAK dy herë në muaj, avokati: Vendim i çuditshëm!
