Një sherr mes komshinjëve është regjistruar pasditen e kësaj të mërkure në Tiranë, ku ka përfunduar me plagosjen e babë e bir.
Ngjarja ka ndodhur rreth orës 16:15, në rrugën “Shyqyri Ishmi”.
Autoritetet policore raportojnë se gjatë një konflikti për motive të dobëta,në hyrje të pallatit ku banojnë, shtetasi Kristjan Thaçi, 34 vjeç, ka dëmtuar me një mjet prerës komshiun e tij, shtetasin Mario Miha, dhe me sende të forta shtetasin Arben Miha.
Burime bëjnë me dije se i riu është ankuar se babë e bir “po bënin shumë zhurmë në pallat”, ndërsa 34-vjeçari është konfliktuar me komshinjtë dhe më pas i ka qëlluar me thikë e me sende të forta.
Sherri ka ndodhur në katin e pestë të pallatit.
Të plagosurit babë e bir Arben dhe Mario Miha, 60 dhe 21 vjeç, janë transportuar me urgjencë në spital, ku ndodhen nën kujdesin e mjekëve.
Autori i plagosjes së dyfishtë Kristjan Thaçi është arratisur pas krimit, por është kapur dhe arrestuar më pas nga blutë e kryeqytetit.
Grupi hetimor po punon për sqarimin e rrethanave të ngjarjes.
