Shtatë ditë nga arrestimi i Darin Gëzdarit dhe Arlinda Markut për akuzën “Pastrimit të parave” dhe “Fshehjen e të ardhurave”, Prokuroria e Tiranës ka vendosur të kryejë një lëvizje proceduriale, duke dërguar letër-porosi në drejtim të autoriteteve të drejtësisë kanadeze.
Kjo lëvizje ka ardhur si pasojë e domosdoshmërisë hetimore, për të provuar nëse shuma financiare prej gati 11 milion euro, është transferuar realisht tek 8 kompanitë kanadeze dhe ku është shpenzuar kjo sasi monetare që ka mbërritur nga kompania shqiptare “Green View Marketing”.
Sipas “Ora News”, provohet se pikërisht nga kjo kompani janë transferuar nga 2021 deri 2022 gati 11 milion euro në drejtim të llogarive bankare të 8 kompanive kanadeze.
LEXO EDHE: Detaje/ Një ‘roje plazhi’ qarkulloi 11 mln euro, si u zbulua skema nga Prokuroria dhe Tatimet
Sipas dokumentit, kompanitë që kanë përfituar sasinë e eurove të mbërritura nga Shqipëria, janë “Canada Inc Profectus Group”, “Tlc Import and Export Limited”, “Suprmedia Limited”, “Sltm Limited”, “Maxent Limited”, “Betway ltd Guernse Branch”, “Coe Services Limited” dhe “Sëiss Zedo Ag Bahamas”.
Të gjitha këto kompani duhet të japin shpjegime para autoriteteve kanadeze, dhe më pas drejtësia e këtij vendi të vendosë nëse do i kthejë përgjigje Prokurorisë së Tiranës ose jo.
Hetimi i kryesuar nga prokurori Ndini Tavani, zbuloi se kompania shqiptare nga ishin kryer transfertat, ushtronte aktivitet tregtar në zonën e Lezhës, ku objekti i saj i operimit ishte “Agjenci Publiciteti”.
Administrator ishte Darin Gëzdari, ndërsa themelues i saj ishte Edmir Simoni, që nga hetimi rezultoi se ky person kishte si detyrë roje plazhi në një subjekt privat në Shëngjin.
Në dosjen e saj, prokuroria e Tiranës shton se “Green View Marketing”, objekti hetimi, dyshohet se ka funksionuar si katalizator për pastrimin e parave, e cila ka lëshuar fatura fiktive duke mos kryer asnjë shërbim dhe duke mos ushtruar në asnjë moment aktivitet ligjor shoqërive të huaja, të cilat shumica kanë aktivitet të kazinove dhe lojërave të fatit dhe më pas duke i transferuar në kompani të ndryshme jashtë Shqipërisë./Ora News
Detaje/ Një ‘roje plazhi’ qarkulloi 11 mln euro, si u zbulua skema nga Prokuroria dhe Tatimet
