Nga Boldnews.al
Një skemë e dyshuar pastrimi parash në vlerë 11 milionë euro u zbulua këtë fundjavë nga Prokurori i Tiranës, Ndini Tavani, pasi administratori i disa kompanive të marketingut dixhital, Darin Gëzdari, tentoi për disa javë të luante një lloj loje “macja dhe miun” me administratën tatimore.
Biznesmeni tentoi të shmangte tre herë kontrollet tatimore dhe ndryshonte herë pas here adresën e subjektit, veprime që krijuan dyshime se po tentonte të fshihej.
Dyshimet e Tatimeve dhe të Prokurorisë së Tiranës duket se ishin të përligjura. Verifikimet e kryera mbi kompaninë “Green View Marketing” dhe rrjetit të shoqërive të lidhura me të, siguruan informacione, mbi të cilat u ngrit dyshimi i fortë se kompanitë e Gezdarit ishin të përfshira në skemë pastrim parash.
Kjo skemë ishte e ndërtuar në dy faza klasike; në llogari të shoqërive të Gëzdarit vinin miliona euro nga shoqëri të ndryshme bastesh, të regjistruara në Maltë, Gjilbraltar, Qipro, e të tjerë dhe më pas, pjesa më e madhe e këtyre shumave transferoheshin në zona të njohura si parajsa fiskale, si Bahamas, Hong Kong, e të tjerë.
“Macja me miun”
Prokuroria e kryeqytetit njoftoi këtë të Premte (20 Dhjetor 2024), arrestimin e Gëzdarit dhe një bashkëpunëtoreje të tij, Arlinda Marku, nën dyshimet se kanë kryer veprat penale të “fshehjes së të ardhurave” dhe “pastrimit të produkteve të veprës penale”.
Sipas të dhënave të dosjes hetimore, të siguruara nga “Boldnews.al”, rezulton se Drejtoria Rajonale Tatimore e Lezhës planifikoi në shtator të këtij viti që të kryente një inspektim pranë kompanisë “Green View Marketing”.
Tatimorët kishin ngritur dyshime mbi këtë kompani, për shkak se kishte kryer transaksione të shumta, ndërkohë që nuk kishte staf, përveç administratorit, që ishte njëkohësisht edhe ortaku Gezdari.
Ky subjekt tregtar ndryshonte adresën, sa herë që njoftohej nga Tatimet për kontroll të thelluar, veprime që krijuan dyshime se kishte diçka për të fshehur. Në tentativën e fundit në radhë të kontrollit, administratori Gezdari kishte njoftuar Drejtorinë Rajonale Tatimore se ishte në gjendje shumë të rëndë shëndetësore, duke synuar sërish shtyrjen e inspektimit.
“Pronari” i parë, roje plazhi
Pas sinjalizimit nga Tatimet, prokuroria e Tiranës nisi hetimet mbi rastin e “Green View Marketing”. Shoqëria është regjistruar në vitin 2020, me seli në Lezhë dhe pronar fillestar Edmir Simoni.
Një muaj më pas, shoqërinë e blen një shtetas italian, ndërkohë që Simoni vijon të qëndrojë administrator deri në shkurt të vitit 2023.
Gjatë kësaj periudhe, shoqëria ka kryer transaksione të shumta, të cilat kanë ngritur dyshimet tek autoritetet hetimore.
Ndërkohë që mbante funksion drejtues në këtë shoqëri, Edmir Simoni rezulton që të ishte i punësuar njëkohësisht edhe si roje plazhi në një lokal në Shëngjin, gjë që shtoi dyshimet se ky shtetas nuk ka mundur të realizojë të gjithë aktivitetin e deklaruar financiar të “Green View Marketing”.
Po ashtu, në librat tregtar të shoqërisë, gjatë periudhës që administrohej nga Simoni, gjenden pagesa që ai ka kryer për qera në llogari të F. Gezdari, nëna e Darin Gezdarit, i cili blen kompaninë në shkurt 2023. Këto lëvizje kanë krijuar dyshimet tek autoritetet hetimore se veprimtaria e kompanisë, që prej fillimit të saj, është kontrolluar nga ky i fundit.
Miliona euro shitje, zero pajisje
Hetimi penal ka zbuluar se shoqëria “Green View Marketing” nuk ka asnjë instalim apo makineri e pajisje informatike, e, megjithatë, ka arritur të kryejë shitje elektronike në shumën mbi 1 miliardë lekë të reja në periudhën 2021-2022.
Sipas të dhënave të siguruara nga hetimi, rezulton se janë rreth 30 shoqëri të huaja, të gjithë të përfshira në aktivitetin e basteve sportive ose të lojëra on-line, që kanë kryer pagesa në favor të shoqërisë shqiptare “Green View Marketing”.
Në deklaratën e fitimit për vitin 2021, shoqëria deklaron se ka kryer shitje shërbimi për kompanitë e basteve në vlerën mbi 990 milionë lekë të reja.
Në vitin 2022, sipas vetëdeklarimit të shoqërisë, rezulton se ajo ka shitur shërbime në shumën e rreth 50 milionë lekë të reja.
Pjesa më e madhe e këtyre fondeve transferohet në disa entitete, në zona “off-shore”, ndërsa shuma të tjera në vlera nga dhjetra deri në disa qindra mijëra euro, kalojnë në llogaritë personale të ortakut Darin Gezdari dhe shtetases Arlinda Marku, ose tërhiqen nga këta të fundit, pa u tregua destinacionin.
Për prokurorinë e Tiranës, kompania “Green View Marketing” dyshohet se ka funksionuar si katalizator për pastrimin e parave. Bazuar në hetimin e deritanishëm, Prokuroria ka krijuar bindjen se shoqëria private ka lëshuar fatura të dyshuara fiktive për llogari të kompanive të huaja të basteve, duke mos kryer ansjë shërbim dhe duke mos ushtruar aktivitet ligjor, si edhe më pas ka transferuar paratë në llogari off-shore.
Lista e kompanive, për të cilat janë lëshuar fatura shërbimi
1. GAMETECH MARKETING LIMITED, (Gibraltar)
2. HILLSIDE SPORTS GP LIMITED, (GIBRALTAR)
3. MONKEY 9 LIMITED AVLONOS, (QIPRO)
4. DREAM BOX GAMES OU, (ESTONI)
5. Secretary’s Lane Gibraltar (GIBRALATAR)
6. COE SERVICES LIMITED (GIBRALTAR)
7. GENESIS GLOBAL LIMITED (MALTE)
8 BML Group Limited (MALTE)
9. CONNECTPAY UAB (LITUANI)
10. BQC Consulting GMBH CO (ZVICER)
12. MT ROOTZ LTD (MALTE)
12 Heroic Promotion Limited (GIBRALATAR)
13. SUPRMEDIA LTD – SUPRHOLDINGS LTD (GIBRALTAR)
14 FINANCE INCORPORATED LIMITED (MALTE)
15 MATCHING VISIONS LIMITED (MALTE)
16 1UP Services (CY)Limited (QIPRO)
17 Mediaology Limited (GIBRALTAR)
18 Aspire Global PLC (MALTE)
19 Ëhite Hat Holdings LTD (Gibraltar)
20 Red Rhino Limited (MALTE)
21 TRUE FLIP GAMING LTD(MALTE)
22 Fair Game Software Kft. (HUNGARI)
23 EMP System Limited (MALTE)
24 PRIVALGO LIMITED (GIBRALTAR)
25 SQUIBO Limited (QIPRO)
26 DMG Solution LTD (GIBRALTAR)
27 BETWAY LTD GUERNSEY BRANCH(GIBRALTAR)
28 NORTH POINT MANAGEMENT LTD (MALTE)
29 Blow Fish Marketing LTD (GIBRALTAR)
30 BUTONS LIMITED (GIBRALTAR)
31 Videoslots Limited Casinos (MALTE)
32 DMG Solutions B.V.
33 ML Entertainment Holding Limited (MALTE)
34 GAMING ONE LIMITED (MALTE)
35 AFFILIATION LUCKYDAYS
36 Maxent Limited (MALTE)
37 Maxent Limited (MALTE)
38 Canada Inc (Profectus Group)
Lista e kompanive ku janë transferuar paratë
1. Canada Inc rofectus Group)
2. TLC IMPORT&EXPORT CO LIMITED
3. Suprmedia Limited
4. SLTM LIMITED
5. Maxent Limited
6. BETWAY LTD GUERNSEY BRANCH
7. COE Sevices Limited
8. SWISS ZEDO AG (Bahamas)
