Kreu i PD-së, Sali Berisha i ka bërë thirrje mazhorancës nga foltorja e Kuvendit që të votojnë sot rezolutën që dënon gjenocidin serb në Kosovë.
Thirrja e Berishës vjen një ditë para mbledhjes së përbashkët të dy Kuvendeve në Prishtinë, ai i Shqipërisë dhe ai i Kosovës.
Berisha iu drejtua deputetëve socialistë që të votojnë rezolutën që nesër të shkojnë në Prishtinë si përfaqësues të shqiptarëve, ose në të kundërt do të jenë më të afërt si përfaqësues të Serbisë.
Berisha në Kuvend: Meqënëse edhe në mëngjes e ngrita para mediave, tani thashë ta shtroj edhe në parlament. Të ndërprisni menjëherë punimet, të sillni këtu rezolutën për denoncimin e gjenocidit serb në Kosovë, se përndryshe ulja juaj në parlamentin e Kosovës është më e largët si përfaqësues të Shqipërisë dhe më e afërt si përfaqësues të Serbisë. Sepse, ju keni refuzuar rezolutën. Votoni sonte rezolutën e dënimit të gjenocidit serb në Kosovë, në mënyrë që të shkoni nesër si përfaqësues të shqiptarëve, dhe jo si ata që nuk njihni krimet e shëmtuara.
Unë, po ju them ju këtu, që në librat e gjenocidit ato janë të përshkruara si krimet më të padëgjuara ndonjëherë në histori, dhe ju e hidhni poshtë këtë. Prandaj, zonjë, çfarë të të them unë ty. Merr, silleni rezolutën ta votoni. Të votoni një ndjesë publike për sanksionet që i vutë Kosovës të parët në Europë. Të votoni një ndjesë publike për ndalimin që i bëtë himnit për Adem Jasharin “Mora fjalë”, dhe u fsheh pastaj se zëvendësuan me një këngë shumë të bukur, nuk e mohoj, “Rrjedh në këngë e ligjërime”, për Shqipërinë, por nuk zëvendësohej se, ajo e zuri vendin. Shkurte Fejzën e ftuan, ishte në stadium dhe tani u erdhi telefoni i kuq nga Beogradi dhe e hiqni ju atë. Si do shkoni ju atje? Hidhe në votë propozimin tim. Moj zonjë, hidhe në votë propozimin tim, kaq. Jeni dakord, të ndërpresim seancën dhe të sjellim rezolutën, apo s’jeni dakord? Këtë kërkoj unë!
Por, deklaratës së Sali Berishës iu përgjigj kryetarja e Kuvendit, Elisa Spiropali, e cila e konsideroi si një provokim të pavend.
“Këto provokime janë të pavend dhe të paparshtashme”, u shpreh Spiropali, e cila theksoi se do të dilet me një deklaratë të përbashkët ku do të qartësohen të gjitha çështjet.
