Qeveria ka shkarkuar nga detyra zëvendësministren e Arsimit, Nina Guga. Ky vendim vjen pas përfshirjes sl saj në skandalin me projektin fantazmë që u premtonte nxënësve, prindërve dhe mësuesve udhëtime dhe trajnime në SHBA, por që nga hetimet e policisë u zbulua se ishte gjithçka një skemë mashtrimi.
Në vend të Nina Gugës, në postin e zv.ministres së Arsimit është emëruar Orjana Osmani, teksa vendimi është marrë në mbledhjen e sotme të Këshillit të Ministrave.
Mashtrimi me kodin “mbesa e Edi Ramës”
Kujtojmë se Nina Guga u mashtrua nga 20-vjeçari Ermes Hoxhalli nga Devolli dhe student i vitit të parë në Universitetin e Arteve në Tiranë.
Nëpërmjet aplikacionit “Whatsapp”, ai krijoi një identiet të rremë dhe u prezantua në Ministrinë e Arsimit si “Klea Rama”, mbesa e kryeministrit Edi Rama.
Ermes Hoxhalli dorëzoi virtualisht një projekt joshës-“Let’s Talk About US 2023-2024”-një cikël trajnimesh me konkursesh, nëpërmjet të cilit maturantët shqiptarë do të kishin mundësi të vijonin studimet e larta në Shtetet e Bashkuara.
Askush nuk e takoi, askush nuk e verifikoi identitetin e Kleas. Mjaftonte vetëm fakti që ajo përdori kodin “jam mbesa e Edi Ramës” dhe të gjitha rrugët iu hapën si me magji në sistemin arsimor shqiptar, duke nisur nga Kupola.
Një e-mail dhe disa komunikime telefonike gjatë vitit 2023 mes “Kleas” dhe zv.ministres Nina Guga, u pasuan me urdhëra e urdhëresa drejtuar dhjetra gjimnazeve në të gjithë Shqipërinë, për t’u bërë pjesë e “Let’s Talk About US”.
Drejtoritë vendore arsimore dhe drejtoritë e gjimnazeve krijuan borde e caktuan koordinatorë për projektin, organizuan konkurse lokale e kombëtare mes maturantëve, u përzgjodhën fituesit dhe….të gjithë qëndronin në pritje të fjalës së fundit nga “Klea, mbesa e kryeministrit”. Por fjala e Kleas nuk mbërriti.
“Kontakti im me personin e prezantuar si Klea Rama është vendosur në datat 15-16 shtator 2023”, ka dëshmuar zv.ministrja e Arsimit, Nina Guga, në Prokurori.
Guga është kontaktuar nëpërmjet “Whatsapp” nga një numër i huaj, që u prezantua si Klea, e cila i është prezantuar si një studente shqiptare në SHBA dhe dëshironte që të bënte një projekt me gjimnazet shqiptare. Në ato komunikime telefonike, “Klea” i thotë zv.ministres se projekti mbështetej nga Departamenti i Shtetit, nëpërmjet Ambasadës Amerikane në Tiranë.
Në këto komunikime, “Klea” i ka dërguar Gugës edhe një foto, një figurë femërore, në krah të kryeministrit Edi Rama, duke e bërë më të besueshme se ishte “mbesa e kryeministrit”, siç i ishte prezantuar zv.ministres së Arsimit.
Guga deklaron se e ka përcjellë kërkesën e “Kleas” tek drejtori i projekteve dhe drejtori i arsimit parauniversitar në Ministrinë e Arsimit, Zamira Gjini dhe Shkëlqim Allkaj, me qëllim që këta të vendosnin kontaktet me drejtoritë arsimore në rrethe të ndryshme për idenë e prezantuar nga “Klea Rama”.
Kodi: “Mbesa e Edi Ramës”. Si u tërhoq për hunde sistemi arsimor nga 20-vjeçari-Hetimi
