Në zgjedhjet parlamentare që pritet të mbahen më 11 Maji të vitit 2025, do të garojnë një numër i madh forcash politike, me partitë e vjetra, që disa prej tyre do të jenë në “luftën” për rezistencë, dhe partitë e reja, ku shumë prej tyre i ngjajnë njëra-tjetrës, teksa do të luftojnë për t’u futur në politikën aktive të Kuvendit.
Anëtari i “Lëvizjes Bashkë”, Kristjan Zoto ka bërë një ndarje ku i ndan në 4 grupime forcat politike që do të marrin pjesëë bazuar mbi idetë politike që ato përfaqësojnë.
Në grupin e parë, ai fut “Lëvizjen Bashkë” të drejtuar nga Arlind Qori si të vetme forcë politike në garë që përfaqëson një forcë të majtë progresive, me një vizion të qartë për drejtësi sociale, luftë kundër oligarkisë dhe përfshirje qytetare.
Tek grupi i dytë, futen partitë e djathta konservatore dhe liberale, duke përfshirë Partinë Demokratike, si forcën kryesore të këtij grupi, teksa në këtë grup fut edhe LZHK-në e Dashamir Shehit, si dhe fraksionet e ndara nga PD të cilat kanë krijuar parti të reja si “Mundësia” e Agron Shehajt, “Djathtas” e Enkeljd Alibeajt apo “ShpresOn” e Altin Goxhajt.
Në grupin e tretë fut partitë pa ideologji, të cilat deklarojnë se janë përtej të djathtës dhe të majtës, si Partia Socialiste e shndërruar në “Rilindje” të Edi Ramës apo edhe partitë e reja të Adriatik Lapajt, Endrit Shabanit apo historianes Elena Kocaqi.
Ndërkohë, tek grupimi i katërt fut PSD-në e Tom Doshit dhe Partinë e Lirisë së Ilir Metës, që sipas tij, mbështeten kryesisht në praktika klienteliste dhe përdorin favorizime për të tërhequr votues.
Kristjan Zoto shkruan në postimin e tij në rrjetet sociale se në horizontin e 2025-tës, kjo ndarje do të përcaktojë rrjedhën e mëtejshme të politikës shqiptare dhe ndikimin e saj në zhvillimin e demokracisë dhe shoqërisë.
Postimi i plotë:
Në zgjedhjet parlamentare të vitit 2025 në Shqipëri, partitë politike mund të kategorizohen në katër grupe kryesore, bazuar në ideologjinë, mënyrën e organizimit dhe funksionimin e tyre në skenën politike:
1 – Partitë e majta: këtu është vetëm Lëvizja BASHKË që përfaqëson një forcë të majtë progresive, me një vizion të qartë për drejtësi sociale, luftë kundër oligarkisë dhe përfshirje qytetare.
2 – Partitë e djathta konservatore dhe liberale: kjo kategori përfshin partitë tradicionale dhe ato të reja që përfaqësojnë të djathtën politike, duke përfshirë grupime me orientime konservatore dhe liberale. Përçarjet brenda Partisë Demokratike kanë çuar në formimin e disa partive dhe fraksioneve.
3 – Partitë pa ideologji të qartë: këto parti e pozicionojnë veten “përtej të majtës dhe të djathtës”. Partia në pushtet, e cila është larguar nga ideologjia tradicionale e majtë, ka evoluar në një forcë më shumë pragmatike dhe klienteliste. Këto parti janë të fokusuara më shumë në qasjet pragmatike sesa në vizione të strukturuara ideologjike.
4 – Partitë klienteliste: kjo kategori përfshin partitë që mbështeten kryesisht në praktika klienteliste dhe përdorin favorizime për të tërhequr votues, veçanërisht nga shtresat më të varfra.
Kjo ndarje e partive politike pasqyron qartë fragmentarizimin e skenës politike shqiptare. Lëvizja BASHKË shfaqet si një forcë me ide dhe program të strukturuar, ndërsa partitë e tjera reflektojnë përçarjet ideologjike, pragmatizmin politik ose mbështetjen në struktura klienteliste.
Në horizontin e 2025-ës, kjo ndarje do të përcaktojë rrjedhën e mëtejshme të politikës shqiptare dhe ndikimin e saj në zhvillimin e demokracisë dhe shoqërisë.
