Një i dënuar ka ndërruar jetë mbrëmjen e sotme pranë ambienteve të spitalit “Nënë Tereza”, QSUT në Tiranë.
U bë me dije se bëhet fjalë për 73-vjeçarin Namik Paja, i cili ishte dënuar për veprën penale “Kundërshtim i punonjësit të Policisë së Rendit Publik”.
Sipas Drejtorisë së Përgjithshme të Burgjeve, 73-vjeçari vuante nga një sërë sëmundjesh.
Njoftimi:
Sot, më datë 9 dhjetor 2024, në ambientet e Qendrës Spitalore Universitare “Nënë Tereza” (QSUT), ka ndërruar jetë shtetasi Namik Paja, lindur më 5 janar 1951, banues në Berat. Ky shtetas ishte i dënuar me vendim gjykate për masën “shtrim i përkohshëm” për veprën penale “Kundërshtim i punonjësit të Policisë së Rendit Publik” (neni 236/2 i Kodit Penal).
Paja vuante nga disa probleme serioze shëndetësore, përfshirë:
– Çrregullim Bipolar Tip 1
– Insufiçiencë kardiake dhe Sindrom Iskemik i Zemrës
– Hipertension arterial (stad II-III)
– Çrregullime psikotike
– Hernje umbilikale e diagnostikuar më herët.
Gjatë qëndrimit të tij në institucion, shtetasi Paja është shtruar tri herë në Qendrën Shëndetësore të Burgut dhe është trajtuar me mjekimin e duhur për gjendjen e tij shëndetësore.
Ngjarja është raportuar menjëherë tek organet kompetente, përfshirë Prokurorinë, SHKBB dhe Policinë e Shtetit, të cilat po kryejnë veprimet procedurale në përputhje me ligjin.
Drejtoria e Përgjithshme e Burgjeve ngushëllon familjen për hunbjen e njeriut të tyre.
