Zyrtarë të Partisë Demokratike kanë zhvilluar një takim këtë të enjte në selinë blu me përfaqësues të misionit të SOBE/ODIHR dhe Asamblenë Parlamentare të OSBE, ku në fokus të diskutimit kanë qenë zgjedhjet parlamentare të 11 Majit të vitit 2025.
Më konkretisht në takim kanë qenë nënkryetari i PD-së, Oerd Bylykbashi, Sekretarin për Çështjet Ligjore dhe Zgjedhore, Ivi Kaso dhe përfaqësuesin ligjor në KQZ, Franc Nuri.
Përmes një postimi në rrjetet sociale, Bylykbashi bën me dije se gjatë takimit kanë theksuar shqetësimin për përpjekjet e qeverisë për të minuar opozitën, përfshirë pengimin e përdorimit të vulës dhe simboleve të PD-së për dy vite dhe arrestin antikushtetues të kryedemokratit Sali Berisha.
Gjithashtu, sipas Bylykbashit, kanë ngritur dhe shqetësime për ndjekjen politike të drejtuesve dhe deputetëve të opozitës, vetëm pesë muaj para zgjedhjeve.
Mësohet se përfaqësuesit e PD-së kanë vlerësuar rekomandimet e OSBE/ODIHR si pasqyrë të qartë të shkeljeve serioze të standardeve ndërkombëtare për zgjedhje demokratike, përfshirë shitblerjen e votës, presionin shtetëror mbi zgjedhësit, dhe lidhjet mes politikës dhe krimit të organizuar.
PD ka kritikuar bllokimin e reformës zgjedhore nga mazhoranca, pengesat për votën e emigrantëve dhe kontrollet politike mbi institucionet kryesore zgjedhore dhe gjyqësore.
Në përfundim të takimit, sipas Bylykbashit, PD ka kërkuar një mision monitorimi të zgjeruar nga OSBE për zgjedhjet e ardhshme, duke e cilësuar këtë si një hap të domosdoshëm për të siguruar standarde demokratike dhe për të garantuar zgjedhje të ndershme.
