Nga Basir Çollaku
Presidenti mbase duhej të kishte dekretuar datën e zgjedhjeve. Afatet kushtetuese janë histori orësh. Diçka vlon nën petkat e shtet-pushtetit.
Fitorja e Trump në USA ka trazuar shumë ekuilibra të vjetër. Edi Rama kapërceu ylberin e qëndrimeve për kreun e Shtëpisë së Bardhë, nga turp e kërcënim për njerëzimi, në ndoshta është më mirë për të gjithë.
Çfarë po ndodh në Shqipëri?!?!
Dosjet Sky-Enchochat, ardhur nga Franca-Belgjika, Holanda, janë bërë paniku politik më i madh për pushtetin. Kryeministri Rama pohoi se edhe ai mund të dalë nëpër përgjime.
Po bën gati opinionin kur të derdhen bisedat. Aty mundet të dalin dialogje me banditë vendas e të huaj, me Charles FBI, oligarkë, lobues amerikanë e evropianë, e të tjerë emra të botës së zezë. Mund të këndojmë marrëveshje për trafiqet e drogës, për pastrime parash, për kafshime bregdeti e deti. Prokurorë, gjyqtarë, policë, gazetarë, biznesmenë. Miliarda euro.
Nga Aruba në Uashington, Moskë, Berlin, e shumë adresa. Olsi Rama, vëllai nëpër afera, mbetet me orë të shkurtuara. Dosja “Çyrbja”, ” Metamorfoza”, “Revanshi” e shumë të tjera dosje me miliona mesazhe po rrëfejnë krimin elektoral të Rilindjes me Mafian. Ata propozonin Rama firmoste. Kështu kanë bërë edhe me vetingun. Bandave nuk u është refuzuar asnjë kërkesë.
Dosjet e Bashkisë së Tiranës me së paku dy grupe të strukturuara kriminale, janë ekipi zgjedhor i kryeqytetit me në krye kryetarin Erion Veliaj, të cilin SPAK po e heton familjarisht por nuk ka këllqe ta vërë në masë arresti, ndonëse dy herë kanë bërë kërkesë në Gjykatë dhe i jep kohë duke e lënë në zyrë, të shkatërrojë hetimin.
“Soros” marrëveshja për të kontrolluar të quajturën reformë në drejtësi, firmosur nga Shtylla-Dobrusha, për Kuvendin e Fondacionin, është binari tjetër thërmues i mossundimit të ligjit. Ajo duhet hetuar në qelizë.
Numri i të pandehurve deputetë e shtetarë do të rritet. Prokurorja federale belge në Tiranë dhe prokurorë holandezë, pa harruar mallin hetimor nga Brazili e Dubai, janë pagjumësia e re qeveritare nga Balla, Belinda, Mania, Klosi, Peleshi, Xhaçka, Xhafa, Gjoni, Spiropali, Çuçi, Krifca, Hoxha, Mazniku, me rezultat trokitjen në derë të BKH.
Kërkesës së diplomatëve të BE për të mos emëruar Prodën për dyshime të shumta të lidhjeve me bandat, qeveria nuk i përgjigjet por e thellon me emërimet shtesë të ngjashme. Ka një kalendar të ri. Xhorxhi nuk udhëton dot më.
Leksi ka halle të mëdha dhe ska kohë të vijë e përqafohet prehërisht me vëlla Ramën e vëlla Veliajn apo darkojë me kushërinjt prokurorë të SPAK për minuta shtesë. As të mbrojë ushtarët e pengreformës së tij.
SPAK të zbardhë kënetën e SKY-ENCRO politik dhe të zinxhirit të drejtësisë, pa asnjë lloj amnistie politike. Majtas apo djathtas qofshin. Të braktisë efektet “Soros”, edhe nëse vijnë nga Ambasada amerikane siç ka ngjarë këto vite shpesh ose gjithnjë. Nëse e bën pa u ndikuar, atëherë Edi Rama, Erion Veliaj, dhe 70 përqind e ekipit të tij politik e administrativ, së paku do merren të pandehur para zgjedhjeve parlamentare 2025 dhe të mos jenë kurrë funksionarë publikë.
Natyrisht të kthejnë çdo qindarkë të vjedhur. Opozita këtë hartë e ka si mundësi dhe bonus, se çfarë të ofrojë tërësisht ndryshe nga keqbërësit në qeverisje.
