Në përfundim të seancës së sotme plenare në Kuvend është miratuar buxheti faktik i vitit 2023, teksa gjatë momentit të votimit nuk ka patur asnjë deputet të Partisë Demokratike dhe aleatëve të saj.
Buxheti faktik i vitit 2023 është miratuar vetëm me 71 vota pro të deputetëve socialistë, teksa dy deputetët e PDIU-së Shpëtim Idrizi dhe Mesila Doda, të cilët ishin të pranishëm në sallë, votuan kundër.
Gjatë seancës, miratimi i buxhetit faktik pati debate, ku pjesë e diskutimit ishin dhe deputetët e opozitës, si Gazment Bardhi, Jorida Tabaku dhe Dashamir Shehi.
Tabaku nënvizoi se 2023-a ishte viti kur shqiptarët përjetuan një rritje të lartë të çmimeve, ku artikujt bazë shënuan një rritje deri në 29.5%, duke rënduar tej mase xhepat e qytetarëve.
“Çfarë bëri qeveria për të ndihmuar qytetarët? Transferoi 80 milionë euro drejt firmave kontraktore për beton, ndërsa për pensionistët dhe administratën, nuk pati asnjë mbështetje konkrete,” tha ajo.
Tabaku theksoi gjithashtu se modeli ekonomik i ndjekur nga Qeveria Rama përqendrohet vetëm në ndërtim dhe pastrim parash, duke lënë pas dore shumicën e qytetarëve.
“Shqipëria ka nevojë për një model ekonomik që i drejtohet 95% të qytetarëve dhe jo vetëm elitave,” theksoi ajo, duke i kërkuar qeverisë të mbështesë shtresën e mesme dhe të inkurajojë zhvillimin e sektorëve strategjikë si bujqësia.” – tha ajo.
Kritika për buxhetin e vitit 2023 ka patur edhe nga kreu i LZHK-së Dashamir Shehi, ku sipas tij nuk janë realizuar investimet dhe nuk janë përmbushur problemet.
“Tani buxheti i 2023 a i ka përmbushur detyrimet dhe ku ka difektet. Ky buxhet po e quajmë pozitiv në përgjithësi, por nuk ka përmbushur disa probleme. Nuk u realizuan gjithë ato investimet dhe ishte goxha shifër. Ne flasim për investime përditë, por janë shifra shumë të mëdha që kur bëjmë analizën, unë them se duhet të reflektohet. Ka një shenjë të mirë, sepse në vitet e tjera bëheshin 3-4 akte normative. Ndërsa në 2023 janë bërë vetëm dy dhe unë e quaj pozitive këtë punë.
Sigurisht që ky buxheti me 8.2 miliardë nga ana e sasisë padyshim që është i madh për Shqipërinë e kësaj kohe. Por po ti bëjmë një analizë, gjysma e borxhit është ulur për shkak të zhvleftësimit të euros dhe monedhave të huaja. Unë e konsideroj pozitive dhe do të them pse nuk më tremb edhe rritja e borxhit. Po dëgjoj që në buxhetin e ri kësaj temës së PPP-ve i është gjetur një zgjidhje. Duhet të pyesim nëse këto koncesione a kanë qenë eficente për ekonominë shqiptare dhe a kanë dhënë efekte?
Unë doja ta ftoja qeverinë që t’i rishikojë koncesionet për investimet publike. Këtu kemi rrugë, rruga e Arbrit ka 10 vite që ka filluar. Nisi me 280 milionë dhe ka shkuar 400 milionë dhe ende nuk ka mbaruar. E njëjta gjë me rrugën Qukës-Qafë Plloçë, ka ardhur me rritje. E njëjta gjë edhe me këtë rrugën e Elbasanit.” – tha Shehi.
