Policia e Mirditës në bashkëpunim me atë të Lezhës dhe Forcat Operacionale kanë arrestuar një person me rrezikshmëri të lartë shoqërore.
Në kudër të operacionit policor të koduar “THE END“ është vënë në pranga shtetasi Aleksandër Senaj alias Aleksandër Ndoj, 29 vjeç, banues në Dukagjin i Ri të Thumanës në Krujë, i akuzuar për krime kundër personit, armëmbajtje pa leje dhe kanosje për dhënie pasurie.
I riu ka qenë i dënuar më parë në shtetin Italian për vjedhje me armë dhe sipas autoriteve policore po përgatitej mbrëmjen e djeshme për t’u larguar ilegalisht drejt Italisë.
Në momentin e arrestimit Aleksandër Senaj alias Ndoj i është gjetur një armë zjarri pistoletë Bereta, me fishek në fole gati për qitje por nuk ka mundur dot të reagojë.
Përmes një komunikate për mediat, Policia ka sqaruar të gjitha ngjarjet, ku akuzohet si autor 29-vjeçari.
“Aleksandër Senaj alias Aleksandër Ndoj ishte shpallur në kërkim nga Komisariati i Policisë Mirditë për veprat penale të “Shtrëngim me anë të kanosjes për dhënie pasurie”, “Plagosje e lehtë me dashje” e kryer në bashkëpunim dhe “Prodhimi dhe mbajtja pa leje e armëve dhe municioneve luftarakë”, në lidhje me ngjarjen e ndodhur në datë 15 Tetor 2024.
29 vjecari në bashkëpunim me shtetasin Kristjan Marku alias Kristjan Bashaj, (i cili aktualisht ndodhet në Itali dhe është shpallur në kërkim) në ambientet e një subjekti privat (karburant), në rrugën e Kombit në Mirditë, kanë goditur me sende të forta dhe kanosur me armë zjarri për dhënie pasurie pronarin e këtij subjekti shtetasin A.Xh.
-Gjithashtu ndaj shtetasit Aleksandër Senaj alias Aleksandër Ndoj, në shtator 2024, Gjykata e Shkallës së Parë të Juridiksionit të Përgjithshëm Tiranë, i ka caktuar masën e sigurisë “Arrest në Burg”, në mungesë, për veprat penale të “Vrasjes me paramendim” e ngelur në tentativë dhe “Prodhimi dhe mbajtje pa leje e armëve të zjarri dhe municioneve luftarak”, pasi:
Më datë 11.08.2024, në vendin e quajtur Dukagjin i Ri, Krujë, ku ky shtetas ka qëlluar me armë zjarri në drejtim të një automjeti me të cilin udhëtonte një shtetase rumune.” – thuhet në njoftimin e Policisë.
Materialet procedurale u referuan në Prokurorinë e Lezhës për veprime të mëtejshme.
