Policia e Korçës ka ekzekutuar fazën e dytë të operacionit policor të koduar “Break”, duke arrestuar dhe 7 persona të tjerë, që akuzohen se shisnin lëndë narkotike në afërsi të shkollave dhe në lokale nate.
Më konkretisht janë ekzekutuar masat e sigurisë “Arrest në burg” të caktuar nga Gjykata e Korçës, për shtetasit Adi Manoku, 39 vjeç, Besmir Gjezar, 37 vjeç, Kristi Dule, 27 vjeç, Mateo Jahollari, 19 vjeç, Marjus Lako, 34 vjeç, Stiljan Lako, 37 vjeç dhe Erdis Hysi, 27 vjeç.
Adi Manoku akuzohet se ka patur rolin e organizatorit, teksa mbi 7 sshtetasit e mësipërm rëndon akuza për veprën penale “Prodhimi dhe shitja e narkotikëve”.
Gjithashtu, është shpallur në kërkim dhe shtetasi P. H., 34 vjeç, me të njëjtën masë sigurie, për të njëjtën vepër penale. Ndërkohë, Gjykata e Korçës ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve” edhe për shtetasin K. B., 34 vjeç (me rolin e bashkorganizatorit), i cili aktualisht është në burg në Itali për veprën penale “Heqja e paligjshme e lirisë”.
Blutë e qytetit juglindor bëjnë me dije se pjesëtarëve të grupit iu sekuestruan sasi të lëndëve narkotike kokainë dhe kanabis sativa, shuma parash që dyshohet se janë përfituar nga shitja edrogës, si dhe një peshore elektronike, 3 automjete dhe 9 celularë.
Policia raporton se operacioni vijon për të vënë para drejtësisë të tjerë persona që mund të jenë përfshirë në këtë veprimtari kriminale.
