Është zbardhur emri i personit të shpallur në kërkim nga Policia e Korçës, i cili akuzohet si organizatori i vperimtarisë së paligjshme të trafikut të drogës, ku ditën e djeshme u zbulua një magazinë me kanabis në fshatin Voskop.
Burime për mediat bëjnë me dije se bëhet fjalë për shtetasin Santilano Duçi, 38 vjeç, banues në fshatin Voskop. Gjatë kontrollit në banesën e tij, uniformar blu gjetën të kultivuara dy bimë narkotike, si dhe sasi të vogla të lëndëve narkotike kokainë dhe kanabis.
Santilano Duçi e kishte marrë me qira magazinën nga Andon Demirsha, i arrestuar nga Policia, i cili ndërtoi fillimisht godinën për stallë lopës, por pas disa vitesh e kishte mbyllur aktivitetin.
Ndërkohë, në magazinën që ishte në periferi të fshatit Voskop, Policia gjeti 195 kg lëndë narkotike kanabis sativa (bimë në proces tharjeje) dhe pajisje që shërbenin për tharjen dhe përgatitjen e lëndës narkotike për shitje.
Në kuadër të këtij operacioni u arrestuan 4 persona, shtetasit:
Andon Demirsha, 43 vjeç, banues në fshatin Voskop, për veprat penale “Prodhimi dhe shitja e narkotikëve”, kryer në bashkëpunim dhe “Vjedhja e energjisë elektrike dhe impulseve telefonike”;
Gentian Guri, 43 vjeç, banues në Tiranë, për veprat penale “Prodhimi dhe shitja e narkotikëve”, kryer në bashkëpunim, “Prodhimi dhe mbajtje pa leje e armëve, armëve shpërthyese dhe municionit” dhe “Falsifikimi i dokumenteve”;
Anesti Burda, 43 vjeç, banues në fshatin Bulgarec dhe Redion Hamitaj, 35 vjeç, banues në Cërrik, për veprën penale “Moskallëzimi i krimit”.
Gjithashtu, u proceduan penalisht në gjendje të lirë edhe tre gra, të cilat punon në magazinën e kanabisit për paketimin e drogës, duke e bërë gati për shitje. Ato vinin nga qytete të tjera, jashtë Qarkut të Korçës, për të punuar kanabisin në Voskop.
Ndërkohë, Policia nën drejtimin e Prokurorisë po heton nëse ka persona të tjerë të përfshirë nga qarku juglindor dhe qarqe të tjera që dyshohet të ketë ardhur lënda narkotike në fshatin Voskop.
Uniformat blu sekuestruan edhe 1 armë zjarri pistoletë, një sasi kokaine, 1 leje drejtimi false, 7 celularë, 1 automjet, 1 pasaportë, 3 karta SIM dhe një shumë eurosh.
