Nga Basir Çollaku
Zgjedhjet parlamentare 2025, janë ende nën rrezikun serioz të kontrollit nga “184”, “339”, “Metamorfozës”, “Revanshit”, e mjaft dosjeve të tjera të veprave të rënda. Raporti i World Justice, për indeksin e sundimit të ligjit, e rendit Shqipërinë sërish në karriket e lodhura të fundit me etiketë ku thërret qameti, duke dhënë shenja përkeqësimi, sidomos në politikën e ndjekjes penale. Numri i deputetëve e zyrtarëve të lartë shtetërorë në hetim e të pandehur, është rritur. Mund të jenë afro tre grupe parlamentare të formuara me anëtarë Kuvendi të shumicës, të cilët kanë punë hallesh korruptive e kriminale me Strukturën e Posaçme.
Kush janë problemet ende prodhuese rreziku për asgjësimin e zgjedhjeve?
Janë dy telashe serioze ende të pazgjidhura, të mbërthyera thuajse në një. Rreziqe ku drejtësia me gjithë mbështetjen e infrastrukturën, nuk po investohet siç mundësitë janë, për ti parandaluar.
Së pari: Rama garanci e bandave
Së dyti: Bandat garanci e Ramës
Francezët kur pikasin shenja të futjes së duarve në procesin elektoral thonë se në fundjave para të dielës së votimit kanë lehur qentë e fshatit. Kanë ardhur natën të panjohur me çanta parash dhe kanë ujdisur numrat. Qentë shtojnë lehjet se shtohen vizitorët e huaj. Këtu ndër ne, është sofistikuar fort herë më tepër ndërhyrja, duke lënë pak punë për lehjet e qenve, të cilat kanë sërish racion dominues.
Kontratë garancish
Rama si garanci për bandat.? Prokuroria e Posaçme, megjithë sasitë e shtuara të dosjeve të ardhura nga Franca-Belgjika-Hollanda, ka katër apo pesë të tilla nëpër duar, për të cilat edhe kanë dalë të dhëna publikisht. Kryesisht Shkodra, Lezha, Durrësi, tregojnë funskionimin e laboratorëve elektoralë mafie-mazhorancë. Arrestimi i deputetit socialist Jurgis Çyrbja, dëshmoi nëpërmjet përgjimeve se propozimet e grupeve kriminale për renditjet e deputetëve në lista, nga vendet 3 në 5, duke bërë rrokadën, pasi ishin paguar edhe paratë e kërkuara tek koordinatori përkatës, Edi Rama, si kreu i PS, nuk i refuzonte, por nënshkruante. Emra zyrtarësh të lartë të partisë, deputetë, bashkiakë, drejtues të adminsitratës, janë në këtë dosje.
Kanë qenë edhe në 339-ën e para pesë viteve. Kush i mbrojti për të mos qenë të pandehur, të arrestuar dhe dënuar? Kush brohoriste se ata janë akullore? Kur tre deputetë të PS në qarkun e Durrrësit të ikur nga rekordet penale, Koka, Rraja, Çyrbja, kanë 24 mijë vota, më të votuarit e listës, këtu gjendet arsyeja e kontratës së tyre me Edi Ramën. Ai u ofron paprekshmëri nga hetimi, këta i ofrojnë prodhimtari mandatesh dhe votash. Kjo kontratë është dukshëm paligjshmëri dhe inkriminim i palëve.
Në Shkodër po në përgjime dalin bisedat mes Bajrëve e të arrestuarve ku urdhërohen deputetët socialistë se si duhet të veprojnë. Pastaj thonë po kontrollove Ilir Beqen, drejtuesin politik të qarkut, e ke marrë tan Shkodrën. Siç u mor. Makinat e blinduara të bandave në qendra votimi janë video të publikuara nga PD. Rama sërish Pëllumb Gjokën e bën investitor strategjik, duke e shpërblyer për rezultatin e lëndës së kërkuar në kutitë e votimit me grupet e lidhura kriminale. Akuzat mediatike janë të shumta për praninë e të vëllait Olsit, e të Kryetares së Kuvendit Elisa Spiropali nën shoqërinë e Pëllumb Gjokës gjatë fushatës. Njëlloj funksiononin grupet me Ndokën e Rrajën, në Lezhë, Mirditë, Fushë-Krujë, e Krujë.
Në Tiranë supergrupi qëlloi të ishte Bashkia. Erion Veliaj, është në prag të vajtjes pranë drejtorëve në arrest. Dy grupe të strukturuara kriminale, sipas dosjeve Inceneratorëve dhe 5D, ishin shtabi elektoral i kryeqytetit. Ngërç shtohet nga prania në këto ekipe e prokurorëve, gjyqtarëve, bashkiakëve, oficerëve drejtues të policisë. Ata janë gati si eskortë e jo paralizues të personave të inkriminuar. Po, SPAK ka dijeni të detajuar për grupet mazhorancë-mafie në çdo qark të vendit. Rama dhe ortakët penalë, nuk ikin tek e tek. Ata do të përpiqen ta ruajnë njëri-tjetrin ose “vrasin” njëri-tjetrin.
Qëndrojnë bashkë, ose ikin bashkë. Të dyja, ka në dorë ti tolerojë osë ndëshkojë drejtësia, ku Struktura e Posaçme, starton njërën ose tjetrën. Kolaterali i sigurisë mes palëve, ka ndërtuar përmes mafio-votës, mafio-pushtetit, kriminalizimit të ekonomisë, Mafiokracinë, Ndryshimi ndodh nëse SPAK vendos të prishë këtë kontratë në kohën e duhur.
