Deputeti i Partisë Demokratike, Tritan Shehu ka reaguar ashpër në lidhje me një pyetsor që prezenca e OSBE në Shqipëri iu ka kërkuar deputetëve dhe stafit të Kuvendit ta plotësojnë.
Një prej pyetjeve që u është bërë deputetëve është dhe se ata duhet të përcaktojnë seksin, ku kanë tre alternativa: “- Mashkull, – Femër, – Të tjera”.
Dhe pikërisht pyetja e mësipërme është ajo që ka irrituar deputetin demokrat, i cili në një postim në rrjetet sociale shkruan se është e pavend që në një moment të tillë politik në vend, OSBE të shpërndajë një pyetësor të tillë.
Shehu e ka konsideruar si fyese dhe provokative pyetjen e mësipërme dhe bën me dije se do ta refuzojë për ta plotësuar.
“Çfarë kuptojnë ata me opsionin “të tjera” për seksin e deputetëve?! Shqipëria me ligjet e saj, traditën e saj njeh zyrtarisht dy opsione seksuale: Mashkull e femër.” – shkruan i revoltuar deputeti.
Postimi i plotë:
Provokacion’ i Zyrës së OSBE ndaj Kuvendit, a heqje vëmendje për deformimet e demokracisë?! Në këto momente kaq errëta për demokracinë shqiptare e parlamentarizmin. Kur lideri i opozitës është izoluar politikisht, deputetë burgosen për denoncime, ish presidentë rrëmbehen me dhunë, parlamenti shkatërrohet…
OSBE organizon një seminar për “përbërjen gjinore” të Kuvendit! Dhe shpërndan një pyetësor për deputet, të cilëve u kërkohet të përcaktojnë “seksin” e tyre, përmes tre varianteve: 1-Mashkull, 2-Femër, 3-Të tjera
Së pari nuk më duket momenti i përshtatshëm për të tilla pyetësore e seminare, kur OSBE duhet të kishte në qendër të saj zhvillimet e Kuvendit tonë.
Por përtej kësaj, e gjej provokatore e ndesh me ligjet vendosjen e tre “opsioneve” për të përcaktuar seksin deputetet.
Në fakt e gjej edhe qesharake e fyese këtë pjesë, që bëri që unë të refuzoj të ç’fletoj më tej e pra të përgjigjem.
Pikërisht për këtë dëshiroj të pyes autorët e atij pyetësori e seminari:
Çfarë kuptojnë ata me opsionin “të tjera” për seksin e deputetëve?! Shqipëria me ligjet e saj, traditën e saj njeh zyrtarisht dy opsione seksuale: Mashkull e femër.
Shqipëria me Kodin e Familjes njeh vetëm Familjen nga një burrë, një grua e me shpresë fëmijët, biologjikë apo adoptivë ata. Shqipëria ka ligje shumë të qarta për adoptimin e fëmijëve në këtë frymë.
Atëherë pse OSBE merr përsipër të përfshihet në të tilla lojëra?!
Kur duhej të denonconte shkeljet madhore të demokracisë e parlamentarzmit këtu.
