Pas një ndalese disa mujore, kryeministri Edi Rama duket se do t’i rikthehet sërish turit me diasporën, pasi më 26 Tetor pritet të udhëtojë drejt Shteteve të Bashkuara të Amerikës, pasi do të zhvillojë një takim me emigrantët shqiptarë në Gotham Hall të New York.
Ndërkohë, mediat greke raportojnë se më 3 nëntor kreu i qeverisë do të zhvillojë një tjetër miting në Greqi. Këtë herë mitingu do të mbahet në hotelin Porto Palace në qytetin port verior të Selanikut.
Ky do të jetë tubimi i dytë që Rama zhvillon në Greqi këtë vit, pas një eventi të ngjashëm në Athinë në 12 Maj.
Takimi i parë në Athinë pati disa shtyrje, pasi autoritetet greke tentuan të ndalonin prenotimin e stadiumit të madh ku do të mbahej mitingu, për shkak të situatës së tensionuar për burgosjen e Fredi Belerit.
Në kuadër të turit me diasporën, Rama ka mbajtur dhe një miting në Milano të Italisë më 26 Maj, teksa për të dy tubimet, opozita dhe media ka denoncuar se ai ka shpërngulur me urdhër administratën për të marrë pjesë në këto takime dhe për t’i paraqitur si emigrantë.
Vlen të theksohet fakti se në zgjedhjet parlamentare të vitit 2025, diaspora shqiptare do të votojë për herë të parë, teksa votimit pritet të bëhet me postë të paguar nga vetë emigrantët shqiptarë.
