Nga Boldnews.al
Policia Shqiptare ka shpallur në kërkim Vladislav S, një 43-vjeçar nga Moska dhe me banim të përkohshëm në Athinë të Greqisë, i dyshuar për veprën penale të “kanosjes për kryerjen e veprimeve terroriste”.
Ai dyshohet të jetë autori i një teksti dërguar me e-mail në adresat e Shërbimit të Sigurisë së aeroportit “Nënë Tereza”, në Tiranë, ku kërcënonte se do të shpërthente bomba në terminalin e fluturimeve, në rast se Shqipëria nuk do të pranonte se Kosova është pjesë e Serbisë.
Po ashtu, në mesazhe thuhej se ai kishte marrë peng dy shtetas shqiptarë në Greqi dhe u jepte autoriteteve shqiptare 48 orë kohë për të plotësuar kërkesën e tij, në të kundërt “do të humbasin shumë jetë shqiptarësh”. Mesazhi ishte firmosur nga emri “Vlad. M.”
“Boldnews.al” mëson se këto mesazhe kanë mbërritur në adresat e dy operatorëve të Sigurisë së aeroportit shqiptar në Shkurt të vitit 2023.
Pas marrjes së këtij mesazhi, menjëherë kanë nisur procedurat e brendshme të njoftimit brenda hierarkisë së aeroportit, si edhe është njoftuar Policia për veprime të mëtejshme.
Hetimet e mëtejshme, në të cilat u përfshi edhe Interpol Tirana, treguan se autori i këtyre mesazheve kërcënuese ishte një shtetas rus, me banim të përkohshëm në Greqi dhe që kishte probleme të shëndetit mendor.
Të dhënat e siguruara nga Interpol Athina treguan gjithashtu se “Vlad.M.”, emri i vërtetë i të cilit ishte Vladislav S., kishte dërguar mesazhe me kërcënime të ngjashme edhe në Aeroportin e Athinës, si edhe në një tjetër aerodrom grek.
Pas këtyre verifikimeve, rasti u përcoll në Prokurorinë e Tiranës. Kjo e fundit mori nga gjykata vendimin për caktimin e masës së sigurimit “arrest me burg” për Vladislav V., në mes të shtatorit 2024. Pasi nuk është bërë gjetja e tij, Policia Shqiptare e ka shpallur në kërkim ndërkombëtar.
Mesazhet kërcënuese
Pasditen e 16 Shkurtit 2023, në adresën elektronike e një prej punonjësve të sigurisë së aeroportit të Rinasit mbërrin mesazhi: “Përshëndetje. Emri im është Vlad. M…Nëse po e lexoni këtë mesazh, atëherë ka një bombë në shtëpinë tuaj. Ju duhet të kërkoni nga qeveria juaj që ta njohë Kosovën si serbe që të mos shpërthejë bomba. Dhe për të bërë siç thashë, unë kam kapur dy shtetas shqiptarë dhe po i mbaj në shtëpinë time në Greqi në adresën N… E…, A… 131. Nëse nuk respektoni, ata do të jenë në hall të madh. Keni 48 orë për të shpëtuar shumë jetë shqiptarësh.Z VKosovo je Srbia”.
Njëkohësisht, ky mesazh elektronik mbërrin edhe në adresën e një tjetri punonjësi të sigurisë së aeroportit. Dejtuesit e shërbimit njoftojnë menjëherë policinë, e cila anazhon Drejtorinë e Anti-Terrorit.
Zyra e Interpolit të Tiranës kërkoi ndihmën e homologëve grek për të verifikuar adresën e dhënë nga “kërcënuesi” në mesazhin e tij. Nga ky komunikim u siguruan të dhëna interesante për personin që fshihej pas e-mail-eve, si edhe për profilin e tij.
Kush është “kërcënuesi”
Të dhënat e mbërritura nga autoritetet greke tregonin se në adresën e cituar në mesazhin kërcënues banonte shtetasi rus, Vladislav M., rreth 43 vjeç, i cili jetonte në kushte jo të mira higjienike.
Sipas informacionit, ky person vuante nga probleme të shëndetit mendor dhe trajtohej me mjekim. Nga verifikimet e kryera në banesën e tij, nuk u gjetën shqiptarë të marrë peng, siç pretendohej në mesazhin kërcënues.
Në vijim, autoritetet greke përcollën edhe të dhëna të tjera për situatën gjyqësore të këtij individi. Ai është evidentuar si dërguesi i mesazheve të ngjashme kërcënuese në Aeroportiun e Athinës dhe në një spital grek.
Teksti i atyre mesazheve kërcënuese, të dërguara nga e njëjta adresë elektronike me ato që mbërritën edhe në aeroportin e Rinasit, ishte pak a shumë: “Jam një taleban dhe në emër të Allahut do të vras grekë”.
Vladislav M. rezulton se ishte arrestuar në Athinë, në janar 2023, për veprat penale të “Prishjes së qetësisë publike”, “Akte terroriste”, “Kanosje për krim”. Në 26 janar të vitit të kaluar ka dalë para gjykatës, e cila e ka liruar për shkak të gjendjes së tij shëndetësore.
Në 2 gusht të vitit 2023 atij i është hequr leja e qëndrimit në Greqi dhe ai është larguar vullnetarisht me një avion që fluturonte drejt Egjiptit. Në shtator të vitit 2023 Vladislav M. është dënuar me 30 muaj burg nga Gjykata e Athinës, dënim i cili u pezullua për 30 muaj.
Tashmë, ndaj 43-vjeçarit “problematik” rus, Vladislav M., ekziston një urdhër-kërkimi ndërkombëtar nga Policia Shqiptare, pasi gjykata e Tiranës vendosi “deklarim ikje” për atë person, me një vendim të shpallur në fillim të Tetorit 2024.
