Kryetari i FRPD, Besart Xhaferri ka reaguar nëpërmjet një postimi në rrjetin social Facebook për hapjen e kapitullit të parë BE-Shqipëri, ku edhe në ditën e hapjes së grupkapitullit të parë, gjykatat vijojnë me pengmarrjen e eksponentëve të opozitës.
Ai është shprehur në postim se, drejtësia e re që do duhej të largonte nga rruga çdo pengesë të Shqipërisë drejt integrimit në Bashkimin Evropian rrezikon të kthehet vetë në barrierën kryesore të integrimit!
Postimi i plotë:
“Në ditën e hapjes hapjes së grupkapitullit të parë BE-Shqipëri, gjykatat vijojnë me pengmarrjen e eksponentëve të opozitës!
Në konferencën në Luksemburg në kuadër të tryezës së vonuar ndërqeveritare Shqipëri-BE për hapjen e kapitujve për integrimin, Edvin Rama cilësoi drejtësinë e re si kalin që po mban dhe do të mbajë peshën kryesore në plotësimin e kushteve për anëtarësimin në Bashkimin Evropian.
Por në të vërtetë drejtësia e re është kthyer në një drapër në duart e qeverisë duke mbajtur peng opozitën me dosje politike, teksa në të njëjtën kohë amniston korrupsionin e Edi Ramës.
Në kuadër të betejës që drejtësia e re i ka hapur opozitës, sot Gjykata e Lartë vendosi të mos pranojë kërkesën e avokatëve të deputetit Ervin Salijani për mosekzekutimin e vendimit për dënimin e tij.
Tre gjyqtarët Sokol Binaj, Sandër Simoni dhe Ilir Panda, refuzuan lirimin e Salianjit, e duke vendosur kështu një standard të rrezikshëm, pasi përballë këtyre vendimeve deputetët në Parlament do stepen të denoncojnë aktet korruptive të kësaj qeverie, që kanë qenë janë dhe do mbeten barriera me madhe për integrimin.
Shpejtësia për ekzekutimin e vendimit të dënimit të Ervin Salijanit është një dhunë institucionale ndaj opozitës, e janë të njëjtat institucione që nuk pyesin as për vendimet e gjykatës Kushtetuese për të mbrojtur deputetët e mazhorancës.
Me këto ritme drejtësia e re që do duhej të largonte nga rruga çdo pengesë të Shqipërisë drejt integrimit në Bashkimin Evropian rrezikon të kthehet vetë në barrierën kryesore të integrimit!”, shkruan Xhaferri.
