Ligji për të drejtën e informimit ka mungesë të theksuar zbatimi nga institucionet shtetërore, pavarësisht se ai e përcakton qartë transparencën që institucionet duhet të kenë ndaj qytetarëve dhe medias.
Madje jo të pakta janë dhe rastet kur nuk zbatohen as vendimet e Komisionerit për dhënien e informacioneve të kërkuara.
Nisur nga kjo situatë, duket se kryeministrisi Edi Rama do të ndërmarrë një reformë, ku mbetet të shihet, nëse do të përdoret vetëm për propagandë si shumë nisma të tjera apo do sjellë një qasje të re të transparencës së institucioneve ndaj qytetarëve dhe medias.
Burime për mediat bëjnë me dije se këtë reformë kreu i qeverisë do t’ia besojë pedagogut të Gazetarisë në Fakultetin e Historisë dhe Filologjisë, Mark Markut.
Mark Marku ka qenë deputet i Partisë Demokratike, teksa rikandidoi sërish edhe në vitin 2021, ku ishte drejtues Qarku në Lezhë, por pas zgjedhjeve ai dorëzoi mandatin e deputetit, për shkak se nuk ishte dakord me mënyrën se si po drejtohej PD.
Por, edhe pse ishte rival i kryeministrit Edi Ramës në vitin 2021, pak muaj më parë, ai i habiti të gjithë kur u shfaq si i ftuar në podcastin “Flasim” të kreut të Qeverisë, duke dhënë shenjat e para të një ndryshimi të marrëdhënies mes dy kundërshtarëve të dikurshëm.
Pas “podcast-it” me Ramën, Mark Marku u zgjodh Dekan i Fakultetit të Historisë dhe Filologjisë dhe siç duket, kreu i Qeverisë tashmë do i besojë një tjetër post të rëndësishëm.
Ndërkohë, kryeministri Edi Rama reagoi pas lajmit të publikuar dhe e përgënjeshtroi, duke e konsideruar si një lajm të rremë.
Reagimi i Ramës:
LAJM I RREMË
Sigurisht të tilla rrena ka me shumicë në kanalet pa filtra e as higjienë minimale që informojnë shqiptarët, por e bëj këtë përgënjeshtrim vetëm në respekt të faktit që zoti Mark Marku ka ardhur qytetarisht në Podkastin FLASIM dhe më takon t’ia kthej respektin, si njeri me të cilin s’kemi as të njëjtat bindje politike, as varësira të asnjë natyre në punët tona.
Do t’i japë post Mark Markut? Rama përgënjeshtron lajmin: Nuk kemi të njëjtat bindje politike
