Gjykata e Durrësit ka liruar nga burgu dy prej zyrtarëve të Bashkisë së Rrogozhinës, teksa ka konfirmuar masën e sigurisë “Arrest me burg” për tre të tjerë.
Me konkretisht është liruar nga burgu shtetasja Xhemile Uku (aktualisht përgjegjëse e zyrës së Rinisë dhe Sportit Bashkia Rrogozhinë), për të cilën Gjykata ka caktuar masën e sigurisë “Arrest në shtëpi”, duke u urdhëruar që që të mos largohet nga banesa e saj e ndodhur në Lagjia nr. 1 në Rrogozhinë.
Gjithashtu, është liruar nga burgu dhe shtetasja Edlira Ramaj (aktualisht specialiste në zyrën e burimeve njerëzore, Bashkia Rrogozhinë), për të cilën Gjykata ka caktuar masën e sigurisë “Detyrim paraqitje”.
Ndërkohë, kanë mbetur në qeli shtetasit Mario Meka (ish-punonjës i Bashkisë Rrogozhinë), Besim Ballabani (punonjës në Bashkinë Rrogozhinë) dhe Elton Levonja (ish-punonjës Bashkia Rrogozhinë).
5 shtetasit e mësipërm akuzohen se kanë abuzuar me fondet e rindërtimit pas tërmetit, në të paktën 78 raste, duke i shkaktuar buxhetit të shtetit një dëm në vlerën 353.4 milionë lekëve. Ata akuzohen për kryerjen e veprave penale “shpërdorimi i detyrës”, “falsifikimi” dhe “mashtrimi”.
Sipas organit të akuzës, shtetasit Besim Ballabani, Xhemile Uku, Mario Meka, Elton Levonja dhe Edlira Ramaj kishin abuzuar me detyrën, duke regjistruar 78 kasolle për derra dhe lopë, si banesa banimi, duke iu dhënë dëshmpërblim që nuk iu takonte 78 qytetarëve.
“Nga hetimi rezulton se banesat për të cilat është dhënë dëmshpërblimi për shkak të dëmtimeve nga tërmeti nuk kanë qenë për strehim, por në dosjet e tyre janë shënuar objekte të tjera, përfshi dhe kasolle të derrave e lopëve,” citohet në njoftimin e Prokurorisë.
Gjithashtu, organi i akuzës bëri me dije se krahas punonjësve të bashkisë, nën hetim janë vënë edhe 78 personat të cilët kanë bashkëpunuar me zyrtarët për përfitimin e fondeve të rindërtimit. Ata akuzohen për veprën penale të “mashtrimit”.
Burime për mediat bëjnë me dije se Prokuroria e Durrësit nisi hetimet ndaj 5 të arrestuarve pas denoncimeve nga banorë të Rogozhinës, të cilët u ankuan se me proçesin e verifikimit të dëmeve të tërmetit ishin bërë abuzime dhe se kishin përfituar persona të cilët nuk kishin pësuar dëmtime nëpër banesat e tyre. Kjo çoi në hetimin e vendimeve ta marra nga personat e caktuar në këtë proçes dhe rezultoi në shkelje në mbi 78 raste.
Pas tërmetit të vitit 2019, mijëra familje mbetën të pastreha. Megjithëse qeveria ndërmori procedura emergjente të prokurorit, duket se ato nuk dhanë shumë ndihmë. Sipas të dhënave të buxhetit të vitit 2023, deri në muajin tetor ishin shpenzuar vetëm 32% e fondeve të programuara. Ndërkohë, Prokuroria e Durrësit njoftoi se ka zbuluar një skemë të vjedhjes së këtyre fondeve.
