Deputetja e PD-së, Jorida Tabaku, së bashku me kreun e grupit parlamentar Gazment Bardhi kanë bërë me dije se kanë dorëzuar në Kuvend propozimin ligjor, ku kërkojnë rimbursimin e pagesave për të gjithë profesionistët e lirë, pasi Gjykata Kushtetuese e shpalli taksimin si anti-kushtetues.
Në një video të publikuar në rrjetet sociale, Tabaku shprehet se Qeveria po heziton t’ua kthejë paratë profesionistëve të lirë, teksa opozita premton se do t’i shkojë deri në fund kësaj beteje.
Pritet që propozimi ligjor të diskutohet në Kuvend, ku PD do të kërkojë mbështetjen e të gjithë deputetëve për miratimin e tij, në mënyrë që drejtësia dhe barazia të jenë themeli i politikave fiskale në vend.
“Drejtësi për profesionistët e lirë! Qeveria duhet të rimbursojë taksat e marra padrejtësisht dhe të mbështesë bizneset në këtë ekonomi sfiduese. Propozimi ligjor për rikthimin e taksës së marrë padrejtësisht është nje tjetër premtim i mbajtur ndaj shtresës së mesme!” – shkruan Tabaku krahas video-s.
“Ky është propozimi ligjor që, bashkë me kryetarin e grupit parlamentar të Partisë Demokratike, Bardhi, po dorëzojmë për rimbursimin e çdo qindarke të paguar nga profesionistët e lirë pas vendimit të Gjykatës Kushtetuese, që e shpalli taksën ndaj profesionistëve të lirë të pandershme, antikushtetuese dhe të padrejtë.
Ndërkohë që vendimi shqyrtohej në Gjykatën Kushtetuese, qeveria vazhdonte t’i trokiste dyerve të bizneseve, si gjithmonë e fortë me të dobëtin, dhe kërkonte këtë taksë që sot është shpallur antikushtetuese.
Çfarë do të ndodhte nëse unë, një biznes apo një qytetar, do të ishim debitorë ndaj qeverisë?
Ajo do të përdorte të gjithë forcën e shtetit për ta marrë. Ndërkohë që sot, në arkën e shtetit janë paguar këto para që duhet të rikthehen, qeveria nuk po i rikthen. Duke qenë se ata po hezitojnë, ne po bëjmë një propozim ligjor për rimbursimin e pagesave të gjithë profesionistëve të lirë, për t’i shkuar deri në fund betejës që Grupi Parlamentar i Partisë Demokratike ka zhvilluar për profesionet e lira në Gjykatën Kushtetuese, derisa kjo shtresë, që sot është një nga më punëtoret, të mbrohet deri në fund.” – shprehet deputetje e PD-së.
