Turizëm bregdetar, malor por jo vetëm. Të huajt e vizitojnë Shqipërinë edhe për historinë dhe kulturën e saj. Në kala, muze apo site arkeologjike turistët i gjen kudo, edhe në Tiranë pranë dyqaneve të artizanatit për të mësuar më shumë rreth historisë shqiptare.
“Po shikoj për të marrë diçka për të afërmit e mi, motrën time. Produktet e artizanatit janë një formë e mirë për të mësuar më shumë rreth historisë së një vendi”, thonë turistët.
Një pjesë të mirë të turistëve i shohim të ndalojnë pranë dyqaneve apo kioskave me produktet dhe simbolet shqiptare, për të parë, mësuar, shuar kureshtjen apo edhe blerë diçka. Vetëm se këto biznese duket që janë të pakta për shkak se nuk kanë gjetur mbështetjen e nevojshme për zhvillimin e sektorit të artizanatit në Shqipëri.
Ndonëse punimet e Artizanatit Shqiptar janë ndër më të kërkuarat nga turistët e huaj, ato qëndrojnë larg të qenit totalisht efikase dhe në funksion të zhvillimit të turizmit. Sipërmarrës që kanë investuar me të ardhurat e tyre për të ruajtur dhe trashëguar traditën shqiptare, tregojnë se artizanati mund të jetë nxitës kryesor në rritjen e numrit të turistëve në vend.
“Mendoj që jemi në kohën e duhur që ato gjëra që filluan të mos zhvillohen ato pjesë të artizanatit që nuk i trashëguam është koha t’i zhvillojmë dhe jo t’i humbasim”, Silva Subashi, sipërmarrëse.
Por cilët turistë janë ata që interesohen më shumë për suvenire shqiptare dhe sa po shpenzojnë ata në këtë turizëm të artizanatit.
“Ne dëshirojmë ndonjëherë të kemi më shumë vend në valixhet tona për të marrë gjëra më shumë nga Shqipëria dhe tua japim fëmijëve tanë. Ne jemi nga Texas dhe është hera e parë që vijmë këtu”.
“Ne vendosëm që kemi shumë vende për të parë dhe pse jo mos të vizitonim Ballkanin. Shqipërinë e njohëm në një nga portalet e udhëtimeve”.
“Turistët më të rëndësishëm që kemi patur pas pandemisë nga Arabia, pjesa e Dubait që i kanë dhënë frymëmarrje, vazhdojnë edhe shtetas të tjerë.
Të gjithë njerëzit që vijnë interesohen për rakinë, pastaj çaji se e dinë që Shqipëria është e egër dhe janë bio, mjalti, llokumet por dhe shafrani që çuditen kur e dëgjojnë si bimë endemike.”
“Një ndër produktet janë dhe kartolinat me vende apo produkte të ndryshme shqiptare. Sa të interesuar janë turistët ti blejnë si kujtim?”/ A2CNN
