Sot në mesditë një grup aktivistësh të Lëvizjes BASHKË u mblodhën përpara Kryeministrisë për të denoncuar indiferencën e qeverisë për shkeljen e të drejtave të punëtorëve.
Në këto ditë të nxehta, punëtorët e ndërtimit në veçanti nuk gëzojnë mbrojtje të jetës dhe shëndetit të tyre duke mos punuar gjatë orëve më të nxehta të ditës, të drejtë që qeveria ua ka njohur punonjësve të administratës publike, të cilët punojnë në zyra me kondicioner.
Nga ana tjetër ‘Lëvizja BASHKË’ ngre shqetësimin për kushtet e vështira të punës, punën në të zezë, pa kontrata të rregullta, me orare të zgjatura dhe pa pagesë shtesë për mbipunën për shumicën e punëtorëve të sektorit të fasonerisë dhe hoteleri-turizmit.
“Ne kërkojmë sigurimin e të drejtave të punëtorëve njësoj si punonjësit e administratës, cdo punëtor duhet të trajtohet si i barabartë. Duhet të sjellim vëmendjen për punëtorët e fasonerisë dhe hoteleri turizmit. Bëhet fjalë për mbi 100 mijë punëtorë , shumica e të cilëve punojnë në të zezë ose kanë kontrata pune formale. Shumica e punëtorëve të hoteleri turizmit nuk kanë kontrata dhe punojnë në të zezë. Këtyre punëtorëve nuk u paguhen 25% shtesë orët e punës mbi 8 orëshin zyrtar. Nga ana tjetër punëtorëve nuk u paguhet shtesë puna në turnin e dytë e cila duhet të jetë e paguar mbi 20% të orës së punës normale. Ne u bëjmë thirrje punëtorëve të organizohen në sindikata të forta e demokratike. Sindikatat janë kusht jo vetëm i mbrotjes së të drejtave të punëtorëve, por edhe i demokracisë në vend. Lëvizja BASHKË do të jetë përherë në krah të punëtorëve”, tha kreu i Lëvizjes Bashkë, Arlind Qori.
Lëvizja BASHKË i kërkon qeverisë të marrë masa për mbrotjen e të drejtave dhe shëndetit të punëtorëve, duke kufizuar orët e punës në orët e vapës së skajshme, pa reduktim page për punëtorët, si dhe duke vënë në punë Inspektoratin Shtetëror të Punës.
